Мінгарвыканкам даў дазвол на "Чарнобыльскі шлях"
Гарадскія ўлады пагадзіліся на ўсе прапановы, якія вылучалі арганізатары.
Пра гэта агенцтву БелаПАН паведаміў адзін з заяўнікаў акцыі Дзяніс Садоўскі. Па яго словах, сёння зранку заяўнікі акцыі наведалі Мінгарвыканкам. Там ім уручылі пісьмовы дазвол на правядзенне 26 красавіка гэтай штогадовай акцыі.
Арганізатары таксама абмеркавалі з чыноўнікамі тэхнічныя пытанні, звязаныя з правядзеннем шэсця і мітынгу.
Нагадаем, што збор удзельнікаў плануецца 26 красавіка каля Акадэміі навук. Ад 18.30 па вуліцы Сурганава пойдзе шэсце да парку Дружбы Народаў на плошчы Бангалор. Там з 19.30 мае прайсці гадзіны жалобны мітынг.
Скончыць мерапрыемства плануецца ўскладаннем кветак да царквы ў гонар абраза Божай Маці "Спагнанне загінулых" каля парку.
