Генпракуратура Польшчы не лічыць правапарушэннем забарону беларускага сцяга
Пра гэта даведаліся прадстаўнікі беларускіх арганізацыяў на прыёме ў намесніка генпракурора Роберта Гернанда.
Сустрэча адбылася 22 снежня. У ёй прынялі ўдзел прадстаўнік Цэнтра "Супрацоўніцтва без межаў" Ігар Шчэкарэвіч, прадстаўнік "Звязу на карысць дэмакратыі ў Беларусі" Анатоль Міхнавец, прадстаўнік "Еўрапейскай Беларусі" Дзмітрый Бародка, а таксама праваабаронца Андрэй Жукавец.
Намеснік генпракурора паведаміў, што падтрымоўвае рашэнне пракуратуры ў Быдгашчы. Нагадаем, што пракуратура горада прызнала правамоцнай забарону бел-чырвона-белага сцягу на чэмпіянаце Еўропы па баскетболе сярод жанчынаў у Польшчы. Пазней такую ж пазіцыю заняў і суд у Быдгашчы.
На гэтае рашэнне суда беларускія актывісты напісалі скаргу польскаму Камісару па правах чалавека. Цяпер яны чакаюць адказу на свой ліст.
Інцыдэнт з беларускім сцягам адбыўся 25 чэрвеня. Беларусы тады гулялі з літоўкамі. Служба аховы стадыёна, дзе праходзіла гульня, перашкаджала групе беларускіх заўзятараў разгарнуць бел-чырвона-белыя сцягі, а пазней даволі груба выдаліла беларусаў са стадыёна.
