Ці трэба даваць Расіі адтэрміноўку па плацяжах?
Беларускія прадпрыемствы адмаўляюцца працаваць з малавядомымі расійскімі заказчыкамі на ўмовах адтэрміноўкі плацяжоў. Нягледзячы на мільённыя кантракты.
Дамову на мільён долараў прапанавалі Віцебскаму харчова-агародніннаму
камбінату “Ноўка”. Адбылася гэта на 19 Міжнароднай выставе прадуктаў
харчавання і напояў World Food Moscow, якая праходзіла ў Маскве на
мінулым тыдні. Вось толькі дырэктар беларускага камбіната Расціслаў Гошка нібыта прапісаў у кантракце на пастаўкі ў Расію прадукцыі такія ўмовы, што заказчыкі вымушаныя былі ад яго адмовіцца.
Такую
інфармацыю паведаміў Еўрарадыё патэнцыйны кандыдат у прэзідэнты,
начальнік сектара знешнеэканамічнай дзейнасці Віцебскага
садавіна-агародніннага камбіната Сяргей Рыжоў.
Сяргей Рыжоў: “Там
падпісаны кантракт на мільён долараў. Да прыкладу, гэта тры гадавыя
планы па знешнеэканамічнай дзейнасці, якія даводзяць да прадпрыемства.
Але кіраўнік прадпрыемства падпісаў кантракт на загадзя невыканальных
умовах — стоадсоткавая перадаплата. У той час, калі па аналагічных
кантрактах даецца мінімум 60 дзён адтэрміноўкі”.
Паводле
словаў Рыжова, гэты кантракт прапанавала Віцебскаму камбінату
“Беларуская гандлёвая кампанія” канцэрна “Бедзяржхарчпрам”. З тым, каб
прадаваць прадукцыю віцяблян на расійскім рынку. Але дзеянні дырэктара,
кажа прэтэндэнт у прэзідэнты, сарвалі падпісанне гэтага кантракта.
Сяргей Рыжоў: “Беларуская
гандлёвая кампанія” выказала жаданне з намі супрацоўнічаць, даслала нам
афіцыйныя прапановы па супрацы. Яны працуюць па кантрактах з
адтэрміноўкай па плацяжах у 60 дзён з усімі беларускімі вытворцамі. Наш
дырэктар гэта ведае, але, каб сарваць падпісанне гэтага кантракта, ён
накіраваў у Маскву на выставу прадстаўніка з зусім іншымі ўмовамі:
перадаплата 100 адсоткаў. Сёння ніводнае прадпрыемства рэспублікі, якімі
б відамі прадукцыі яно ні займалася, не мае такіх кантрактаў”.
А
ўсё, кажа, дзеля таго, каб яго, начальніка сектара знешнеэканамічнай
дзейнасці, абвінаваціць у прафнепрыдатнасці і звольніць з працы.
Намеснік дырэктара Віцебскага камбіната “Ноўка” Сяргей Сярбенка
паведаміў Еўрарадыё, што ў Маскве сапраўды быў падпісаны кантракт на
пастаўку іх прадукцыі. Нават два. Праўда, адзін — аб папярэдняй
дамоўленасці. А вось другі, з “Беларускай гандлёвай кампаніяй”,
канчатковы. Прычым, з адтэрміноўкай па плацяжах.
Сяргей Сярбенка: “Адзін
кантракт у нас адназначна падпісаны. Мы ім займаліся яшчэ да паездкі ў
Маскву, а ў Маскве толькі ўзгаднілі. Гэта — з “Гандлёвай кампаніяй”,
заснавальнікам якой з’яўляецца Гандлёвы дом “Белдзяржхарчпрам”. Гэта
кампанія сур’ёзная, мы ім дадзім адтэрміноўку. А з астатнімі расійскімі
кампаніямі мы працуем, у асноўным, па перадаплаце”.
Больш за тое, згодна з яго словамі, адтэрміноўку па аплаце іх камбінат дае толькі правераным заказчыкам.
Сяргей Сярбенка: “З кампаніямі, з якімі мы толькі пачынаем працаваць, мы заключаем дамову аб 100-адсоткавай перадаплаце”.
Галоўнае,
кажа, каб арганізацыя, якая прапануе супрацоўніцтва, была сур’ёзная,
мела нейкія актывы ці маёмасць — якія ў выпадку неаплаты пастаўленай
прадукцыі можна было б адсудзіць.
Тое, што кожнае прадпрыемства
мае права прапісваць ўмовы кантракту паводле свайго разумення,
пацвердзіў Еўрарадыё і начальнік упраўлення эканомікі і фінансаў
канцэрна “Белдзяржхарчпрам” Дзмітрый Бараноўскі.
Дзмітрый Бараноўскі: “Гэта
звычайныя гаспадарчыя адносіны паміж суб’ектамі. Адна фірма з другой
дамаўляецца, і ва ўмовах дамовы абгаворвае ўмовы пастаўкі, тэрміны
разлікаў і гэтак далей. Гэта — выключна пытанні прадпрыемства”.
Тое
ж самае сказаў пра адмову падпісваць кантракты на пастаўку прадукцыі з
адтэрміноўкай па аплаце і намеснік міністра эканомікі Андрэй Тур.
А эканаміст Леанід Заіка ўвогуле параіў беларускім вытворцам з асцярогай ставіцца да расійскіх заказчыкаў.
Леанід Заіка: “Існуе
ўжо зараз вялікая запазычанасць расійскіх пакупнікоў за беларускую
прадукцыю. У Расіі прынята “пракатваць”, прынята падманваць. Таму я
згодны з нашым прадпрыемствам, якое ставіць свае ўмовы. Прадукцыю, таго ж
дзіцячага харчавання на мільён долараў, — гэта не вельмі і шмат, за
тыдзень. Калі ласка, за тыдзень і разлічыцеся. Ну, 10-15 дзён. Што за
праблема, чаму 60?”.
І дадаў, што ў сённяшніх умовах лепш
перастрахавацца і не падпісваць кантракт з адтэрміноўкай аплаты, чым
увогуле не атрымаць грошы за сваю прадукцыю.