Бенедыкт XVI на верталёце паляцеў з Ватыкана ў летнюю рэзідэнцыю пап
Каля двух месяцаў ён правядзе ў летняй рэзідэнцыі недалёка ад Рыма, пакуль ідзе рамонт яго будучага жытла — у манастыры ў Ватыкане.
Бенедыкт XVI прыбыў у папскую летнюю рэзідэнцыю Кастэль Гандольфа, перадае ВВС. Перад адлётам 85-гадовы пантыфік сустрэўся з кардыналамі. Яны прыехалі з усяго свету на канклаў, які будзе выбіраць новага папу.
Па дарозе з Ватыкана да верталётнай пляцоўкі Mercedes пантыфіка праводзілі сотні рымлян з дзецьмі. Яны прыйшлі развітацца з першым за 600 гадоў папам Рымскім, які вырашыў добраахвотна скласці свае паўнамоцтвы.
Натоўп каталікоў сустракаў Бенедыкта XVI ужо ў Кастэль Гандольфа, адзначае РБК. Людзі скандавалі яго імя і казалі словы падзякі як на італьянскай, так і на нямецкай мовах. Ужо ў самай рэзідэнцыі Папа выйшаў на гаўбец і падзякаваў людзям за падтрымку.
А 22-й паводле мінскага часу Бенедыкт XVI перастане быць Папам рымскім. У гэты момант швейцарскія гвардзейцы, якія ахоўваюць рэзідэнцыю, пакінуць свой пост ля брамы палаца Кастэль Гандольфа і адправяцца ў Ватыкан.
На чале Рыма-каталіцкай царквы да абрання новага пантыфіка будзе знаходзіцца дзяржаўны сакратар Святога пасаду кардынал Тарчызіё Бертонэ.
Фота — kommersant.ru
