Алімпійскіх заўзятараў папрасілі не твіціць лішняга
Арганізатары Алімпіяды-2012 папрасілі заўзятараў, якія назіраюць за спаборніцтвамі жыўцом, не пісаць твітаў і паведамленняў у сацыяльных сетках па дробязях.
Як паведамляе Reuters, прычынай просьбы з'яўляецца тое, што шматлікія твіты і абнаўленні статусаў, якія адпраўляюцца з мабільных прыладаў, ствараюць перашкоды ў тэлетрансляцыях Гульняў.
"Калі вы хочаце нешта напісаць у твітар, то, вядома, мы не можам вам забараніць. Але ж вельмі просім —падумайце, калі гэта не тэрміновае паведамленне, можа, без яго магчыма абысціся", — заявіў прадстаўнік Алімпійскага камітэта.
Раней мэр Лондана Барыс Джонсан казаў пра тое, што падчас Гульняў-2012 інфармацыйныя сеткі будуць надзвычай перагружаныя з-за росту папулярнасці сацыяльных онлайн-сервісаў.
