Расійскі "Атаммаш" адправіў у Беларусь корпус першага рэактара для АЭС

Намеснік міністра энэргетыкі Беларусі Міхаіл Міхадзюк наведаў "Атаммаш" — Валгадонскі філіял АТ "АЭМ-тэхналогіі". Ён прыняў удзел у цырымоніі адпраўкі ў Астравец корпуса рэактара для першага энэргаблока Беларускай АЭС. Па словах Міхадзюка, якія перадае БЕЛТА, корпус адпавядае ўсім патрабаванням па якасці.

Таксама беларускі чыноўнік азнаёміўся з вырабам корпуса рэактара для другога энэргаблока і парагенератараў. Ён паведаміў, што дамовіўся з кіраўніцтвам расійскага прадпрыемства пра дадатковыя мерапрыемствы па сумесным кантролі якасці з беларускага і расійскага бакоў.

Нагадаем, што першы энэргаблок на Беларускай АЭС плануецца ўвесці ў эксплуатацыю ў 2018 годзе, другі — у 2020-м.

Фота: seogan.ru