П'яны беларус зладзіў дэбош у самалёце, які ляцеў у Магадан
У Магадане 28-гадовага беларуса асудзілі на 1 год і 1 месяц папраўчых работ.
Суд прызнаў яго вінаватым у хуліганстве на паветраным транспарце, піша Далёкаўсходняя транспартная пракуратура Расіі.
Здарэнне адбылося ў сакавіку 2021 года. Нецвярозы мужчына зладзіў дэбош на борце рэйса Масква — Магадан: "Лаяўся нецэнзурнай лаянкай на адрас чальцоў экіпажа і пасажыраў, бегаў па салоне, перашкаджаючы працы бортправаднікоў, перакуліў вазок з ахаладжальнымі напоямі. Затым замкнуўся ў туалетным пакоі, дзе наносіў удары кулакамі па сценах, выклікаючы ў людзей, якія знаходзяцца ў салоне самалёта, неспакой і асцярогі за бяспеку палёту".
Дэбашыра затрымалі супрацоўнікі транспартнай паліцыі, калі самалёт прызямліўся ў Магадане.
На судзе мужчына цалкам прызнаў віну і раскаяўся ў зробленым.
Суд залічыў яму час утрымання пад вартай — з разліку адзін дзень пад вартай за тры дні папраўчых работ. У выніку мужчыну вызвалілі ў зале суда, бо пакаранне ён адбыў.
