Памерлы пасля аперацыі гродзенец "уваскрос" перад адпраўкай у морг

Памерлы пасля аперацыі гродзенец "уваскрос" перад адпраўкай у морг

З фантасмагарычнай сітуацыяй сутыкнулася гродзенская сям'я: у лякарні ім паведамілі, што іх дзядуля памёр, а потым "уваскрос".

25 верасня 2017 года Сяргею Дзмітрыевічу рабілі планавую аперацыю, распавядае сайт newgrodno.by. Пасля яе мужчыну паклалі ў рэанімацыю анкалагічнага аддзялення №5. Хірург распавёў родным, што аперацыя прайшла з ускладненнем: падчас маніпуляцый адбылося спыненне сэрца, але яго змаглі запусціць зноў.

Пазней у гэты ж дзень сваякам нечакана патэлефанавалі і паведамілі, што мужчына памёр. 

На наступны дзень жонка Сяргея Дзмітрыевіча разам з унучкай паехалі ў бюро рытуальных паслуг. І там ім патэлефанавалі з лякарні, паведаміўшы, што "памерлы" ажыў. 

У лякарні сваякам распавялі, што на мужчыне ўжо вісела бірка для адпраўкі ў морг, але ён "уваскрос". Пасля аперацыі, калі мужчыну прызналі мёртвым, усе апараты для падтрымання жыцця хворага лекары адключылі, абязбольванне не праводзілася. 

26 верасня лекары паведамілі сваякам, што Сяргей Дзмітрыевіч у прытомнасці, на пытанні ён адказвае, матляючы галавой. Аднак да самога пацыента нікога з блізкіх не пусцілі: ён знаходзіўся ў рэанімацыі.

А зранку 27 верасня жонцы зноў патэлефанавалі з лякарні са словамі: "Сяргей Дзмітрыевіч памёр. І ўжо дакладна памёр у 7 гадзін 00 хвілін 27 верасня 2017 года".

Сваякі Сяргея Дзмітрыевіча напісалі афіцыйны ліст галоўнаму лекару лякарні. Ён прынёс асабістыя прабачэнні за недакладнае інфармаванне.

У лякарні праходзіць службовае расследаванне гэтага выпадку, дадае "Гродзенская праўда"

Між тым, сваякі падазраюць, што іх дзядуля мог суткі пасля аперацыі праляжаць у моргу і "ажыць" падчас ускрыцця. 

Апошнія навіны

Галоўнае

Выбар рэдакцыі