Паэт Леанід Пранчак падаў у суд на Ірыну Дарафееву за парушэнне аўтарскіх правоў
![Ірына Дарафеева / Фэйсбук](/sites/default/files/styles/gallery_main/public/2023-08/dorof123.jpg.webp?itok=bWDbpuxs)
Ірына Дарафеева / Фэйсбук
4 снежня дэпутатка Палаты прадстаўнікоў шостага склікання, спявачка Ірына Дарафеева расказала Еўрарадыё, што падчас працы ў парламенце яе асабліва цікавіла творчая сфера.
"Я адстойвала правы непасрэдна аўтараў, гэта было важна, — кажа Дарафеева. — Але цяпер, прызнаюся шчыра, сама ўдзельнічаю ў маленькім судовым працэсе".
Спявачка судзіцца з беларускім паэтам і перакладчыкам, аўтарам папулярных песень Леанідам Пранчаком. Той падаў на яе ў суд, таму што Дарафеева без дазволу выпусціла 200 экзэмпляраў дыска з выкананай ёю песняй "Талака" на яго вершы.
"Гэта былі падарункавыя дыскі да юбілею, — кажа спявачка. — Мне яны былі патрэбныя, каб раздаць аўтарам і музыкам. Іх не хапіла. Тым не менш ён [Пранчак — Еўрарадыё] дзесьці дыск знайшоў і вырашыў пасудзіцца менавіта за песню "Талака", якую выконваў мільён выканаўцаў, асабіста я спявала яе яшчэ ў 93-м годзе на фестывалі ў Маладзечне".
Дарафеева кажа, што, запісваючы "Талаку", думала, што паэт будзе шчаслівы ўбачыць яе на дыску, маўляў, песня не забытая.
"Нібы так, але хочацца трошкі грошай", — усміхаецца спявачка.
Апошняе пасяджэнне ў судзе па гэтай справе адбудзецца 30 снежня. Дарафеевай пагражае штраф да 10 базавых велічынь.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.