Новы альбом “Дай Дарогу!” ужо ў інтэрнэце!

“Дай Дарогу!” залілі ў Сеціва новы альбом “Дай Дарогу!”, які быў прэзентаваны ў траўні. Цяпер “лайтовы” рэліз брэсцкіх панкаў можна бясплатна паслухаць і спампаваць у найлепшай якасці.

Кружэлку склалі 13 новых песень, якія Юрый Стыльскі напісаў цягам апошніх трох гадоў. У запісе лонгплэя ўзялі ўдзел новыя музыкі гурта — Аляксандр Закржэўскі і Ілля Церашчук. Звядзеннем і майстарынгам дыска, у адрозненне ад папярэдніх прац, калі “Дай Дарогу!” рабілі ўсё самастойна, гэтым разам займаўся саўнд-інжынер Ілля Курачкін.

“Альбом атрымаўся нейкім такім пазітыўным, — спрабуе ахарактарызаваць навінку лідар гурта Юрый Стыльскі. — У ім больш каліфарнійскага панка, ён больш меладычны… калі параўнаць яго з першым альбомам “Зарубило” (1999), дык увогуле неба і зямля атрымліваецца. Але песні на ім усё пра тое ж! Тое, што я перажыў, што бачыў: крыкі сэрцаў, сацыялка, бытавуха — карацей, усё ў нашых лепшых традыцыях”.

Нагадаем, папярэдні дыск гурта “Сквозь говно” быў названы “Лепшым альбомам-2012” па версіі музычнай прэміі Еўрарадыё “Даём рады”. А ў чэрвені “Дай Дарогу!” атрымаў званне “Артыста года” паводле прэміі Rock Profi.