Neuro Dubel сыгралі канцэртны марафон
11 лістапада ў сталічным "Рэактары" адбылася прэзентацыя новага альбома гурта пад назвай "Афтары правды".
Канцэрт праходзіў у два аддзяленні. Падчас першага музыкі выконвалі новыя песні, прычым у той жа паслядоўнасці, што і на дыску.
Але, нягледзячы на тое, што пачатак складаўся з незнаёмых трэкаў, музыкі
здолелі падняць натоўп ужо першымі песнямі. Як прызнаўся пасля канцэрту
лідар гурта Аляксандр Кулінковіч, ён лічыць гэты факт дасягненнем.
Аляксандр Кулінковіч: "Мне вельмі спадабалася, што мы зрабілі насамрэч
добры прадукт, які здольны завесці чалавека з першага разу. Вельмі
проста завесці чалавека песняй, якую той чуў ужо 154 разы. І вельмі
складана завесці чалавека песняй, якую ён чуе першы раз у сваім жыцці, а
я лічу, што сёння нам гэта пашанцавала зрабіць. Канцэрт атрымаўся, і я
шчыра лічу, што мы аўтары праўды".
І сапраўды, ужо на трэцяй песні ад сцэны выляталі цалкам мокрыя хлопцы,
беглі ў прыбіральню, абліваліся вадой і вярталіся на танцпол. Увогуле,
гэты канцэрт быў вельмі багатым на стэйдж дайвераў, не праходзіла і трох
хвілін, каб хтосьці не забраўся на сцэну і не нырнуў на рукі натоўпу.
Нават адзін са старэйшых удзельнікаў калектыву бэк-вакаліст Юры Навумаў
не вытрымаў, і пад канец выступу таксама сігануў са сцэны. Публіка
вельмі акуратна перанесла Юру да столікаў і вярнула на месца, прычым
музыка амаль паспеў на сваю партыю. У натоўпе фанатаў пад сцэнай
выплясвала і мастачка Ніка Сандрас, якая рабіла вокладку для альбома
"Афтары правды".
"Гэты альбом трошку адрозніваецца ад іншых, і гэта радуе, – падзялілася
яна сваімі ўражаннямі. – Ён па асабліваму пазітыўны і нават трошкі
дурнаваты. Вельмі радуе, што гурт не транслюе адзін і той жа настрой, а з
кожным альбомам паказвае нешта новае".
Мастачка з усмешкай прыгадвае, як Аляксандр Кулінковіч папрасіў яе намаляваць вокладку.
Ніка Сандрас: "Я, напэўна, амаль не прапускаю канцэртаў Neuro Dubel ужо
шмат гадоў. І калі мне патэлефанаваў Кулінковіч і сказаў: "Ніка, мне
рэкамендавалі вас як мастака..". І стаў тлумачыць, хто яны такія, – мне
было вельмі смешна. А складана не было, праўда пра першы малюнак, які на
заднім баку вокладкі адразу сказалі, што ён дзіцячы, і гэта не тое. Я
прапанавала яшчэ два варыянты і хлопцы ўзялі ўсе тры. І я вельмі,
вельмі, вельмі рада!"
Павел Юрцэвіч, дырэктар студыі "Осмос", на якой запісваўся альбом, называе новы дыск моцным і без прахадных песень.
Павел Юрцэвіч: "Альбом моцны, тыповы "дзюбялёўскі" альбом. Ёсць
некаторая колькасць песень, ад якіх хочацца плакаць, рваць валасы, але
вельмі шмат баевікоў, якія проста весяляць. Прахадных песень амаль няма.
І яшчэ радуе, што яны вярнуліся да вытокаў".
А прадстаўнік кампаніі "Будзьма" Севярын Квяткоўскі заўважыў, што ў
новым альбоме Аляксандр Кулінковіч нібыта вярнуўся ў 1990-я гады.
Севярын Квяткоўскі: "Як даўні фанат, хачу сказаць, што пасля альбома
"Танкі" я ўпершыню бачу таго самага Кулінковіча 1995-96-га гадоў, тыя
драйв, іронію, гумар і любоў да жыцця".
Сапраўды, гледзячы па ўзросце, большасць прысутных у залі была менавіта
таго пакалення слухачоў гурта, таму адрываліся яны з задавальненнем. Тым
больш, другое аддзяленне было складзена са старых і ўлюбёных хітоў,
некаторыя з якіх ужо даўно не гучалі на канцэртах. Агулам жа, было
адыграна больш за 40 кампазіцый.
Пасля такога канцэртнага марафону да
прыхільнікаў выйшлі стомленыя, але шчаслівыя музыкі, якія яшчэ з
паўгадзіны раздавалі аўтографы.
Фота Tarantino