На Мастоўшчыне апазіцыйнага дэпутата не запрасілі на сесію

Дэпутата Луненскага сельскага Савета дэпутатаў Аляксандра Пудаўкіна, які з'яўляецца сябрам Партыі камуністаў Беларускай, не запрасілі на сесію. Вось што распавёў Еўрарадыё Аляксандр Пудаўкін:

“Гэта першы такі выпадак за маю шасцігадовую дэпутацкую практыку. Звычайна яны дасылаюць мне пісьмовае запрашэнне згодна з законам аб статусе дэпутата мясцовага Савета дэпутатаў. Я звярнуўся па тлумачэнні да старшыні Мастоўскага райсавета Георгія Каробка і да старшыні сельсавета Ніны Воран. Кіраўніцтва упэўнівае мяне, што паслалі запрашэнне, але ж яно чамусьці да мяне не дайшло. Сітуацыя такая, што сельскі Савет не выканаў сваіх абавязальніцтваў перад законна абраным дэпутатам. Мая паштовая скрыня адкрываецца і закрываецца на ключ, ніколі не было такога, каб прападалі лісты".

Сябра ПКБ лічыць, што прадстаўнікі вертыкалі былі задаволеныя яго адсутнасцю на сесіі, бо не атрымалі ад яго "шэраг важных пытанняў”.