Моцна п’яны пасажыр “замініраваў” цягнік на станцыі метро “Малінаўка”
Моцна п’яны пасажыр “замініраваў” цягнік на станцыі метро “Малінаўка”. Як паведамляе сайт Міністэрства ўнутраных справаў, інцыдэнт адбыўся позна ўвечары 15 лютага. Пасажыр цягніка даехаў да канцавой станцыі, але выходзіць з вагона адмовіўся. Пасварыўся з дзяжурнай па прыёме і адпраўцы цягнікоў і заявіў, што заклаў бомбу. Маўляў, выбухоўка ў яго ў заплечніку.
Супрацоўнікі метро выклікалі міліцыю ў 23:20. На месца прыбылі не толькі праваахоўнікі, але і сапёры. Ні бомбы, ні іншых небяспечных прадметаў і рэчываў у пасажыра не знайшлі. Мужчыну затрымалі.
Пазней высветлілася, што гэта грамадзянін 1985 года нараджэння, у крыві якога знайшлі 1,72 праміле алкаголю. Раней ён меў шматлікія праблемы з законам — крадзяжы, рабаванне, ухіленне ад уплаты аліментаў. Мужчына змешчаны ў ізалятар часовага ўтрымання, яго дзеяннямі дадуць прававую ацэнку.
