Міністэрства гандлю прыпыніла працу мінскай кавярні "Бярозка"
Прычына — выяўленыя парушэнні. Гэта і пратэрмінаваныя прадукты, і невыкананне асартыментнага пераліку.
Міністэрства гандлю Беларусі прыпыніла працу мінскай кавярні "Бярозка", якая месціцца на плошчы Перамогі. Пра гэта БЕЛТА паведаміў Валер'ян Бяспалы, начальнік упраўлення кантроля спажывецкага рынку — гандлёвай інспекцыі Мінгандлю.
Паводле яго слоў, "Бярозка" не працуе з 20 ліпеня. Прычынай прыпынення працы сталі выяўленыя парушэнні. Гэта і пратэрмінаваныя прадукты, і невыкананне асартыментнага пераліку.
На выпраўленне сітуацыі кавярня атрымала 10 дзён. Калі ж гэта будзе зроблена датэрмінова, чыноўнікі абяцаюць раней даць дазвол на аднаўленне працы.
Нагадаем, амаль два тыдні таму падобныя парушэнні Мінгандлю выявіў у мінскім рэстаране "Журавінка", рэстаране хуткага абслугоўвання Food Republic і кавярні River Cafe. Іх зачынілі.
Фота: zoon.by