Макей: Мы маем намер адрадзіць пацярпелыя ад Чарнобыльскай аварыі землі
![Макей: Мы маем намер адрадзіць пацярпелыя ад Чарнобыльскай аварыі землі](/sites/default/files/styles/gallery_main/public/2023-08/village05050402.jpg.webp?itok=uWlLB0mj)
Беларусь мае намер адрадзіць землі, якія пацярпелі ў выніку аварыі на Чарнобыльскай АЭС. Пра гэта заявіў міністр замежных спраў Уладзімір Макей падчас выступу на міжнароднай канферэнцыі "Чарнобыль праз 30 гадоў. Ад аварыйнай сітуацыі да адраджэння і ўстойлівага сацыяльна-эканамічнага развіцця пацярпелых тэрыторый", якая праходзіць у Мінску.
"Можна плакацца, пакутаваць і скардзіцца, але можна і паспрабаваць змяніць сітуацыю, — цытуе словы Макея БелаПАН. — Можна паспрабаваць арганізаваць толькі гуманітарную дапамогу, якая размяркоўвалася б сярод пацярпелых, але можна паспрабаваць і аднавіць гэтыя землі для таго, каб яны былі прыдатныя для пражывання, вырошчвання прадукцыі, якая была б прыдатная ў ежу. Забяспечыць устойлівае развіццё гэтых рэгіёнаў — вось наша галоўная задача".
"Хоць і раздаюцца крытычныя галасы асобных прадстаўнікоў экалагічных арганізацый, паверце: урад Беларусі, прэзідэнт краіны думаюць пра тое, каб быў забяспечаны жорсткі радыяцыйны кантроль за вырабленай прадукцыяй, у тым ліку на землях, якія ў свой час пацярпелі ад чарнобыльскай катастрофы", — падкрэсліў кіраўнік МЗС.
Адраджэнне пацярпелых тэрыторый і забеспячэнне іх ўстойлівага развіцця Макей назваў высакароднай мэтай.