Магілёўская бібліятэка купляе для дзяцей літаратуру толькі расійскіх выдавецтваў
![Дзеці ў бібліятэцы / pexels.com, ілюстрацыйнае фота](/sites/default/files/styles/gallery_main/public/2023-08/knihi-1408.jpg.webp?itok=3OMYNyXh)
Дзеці ў бібліятэцы / pexels.com, ілюстрацыйнае фота
Магілёўская абласная бібліятэка закупляе для дзяцей кнігі толькі расійскіх выдавецтваў, заўважыў сайт "Штодзень".
Электронны аўкцыён абвешчаны праз сайт дзяржзакупак. На набыццё літаратуры плануецца выдаткаваць 50 тысяч рублёў (каля 15 720 долараў) з абласнога бюджэту. Выдавецтвы пры гэтым — спрэс расійскія: "Насця і Мікіта", "МІФ", "Ружовая жырафа", "КомпасГід", "Росмэн", "Махаон" (гэтае выдавецтва зарэгістраванае ў Беларусі, але належыць расійскай выдавецкай групе "Азбука-Атыкус"), "Самакат", "Эксмо", "АСТ".
Сярод выданняў, якія купляюць для беларускіх дзяцей, — такія як “ВДНХ. Главная выставка страны”, “Бульварное кольцо”, “Кремль — сердце Москвы”, “О чём молчат башни Кремля?”, “Московские высотки”, “Необычные дома Москвы”, “Паруса России”, “Парки Москвы”, “Русская изба”, “Как жили на Руси”, “Как Пушкин русский язык изменил”, “Великие победы генерала Ушакова”, “Иркутск. Город сам по себе” і г.д.
Між тым, у Беларусі налічваецца 566 выдавецтваў — столькі іх уключана ў рэестр выдаўцоў на сайце Мінінфармацыі. Чаму ж магілёўскія бібліятэкары закупляюць кнігі з Расіі?
Расійскія кнігі з шэрагу прычын таннейшыя за беларускія. Бібліятэкі ж маюць штогадовыя планы па абнаўленні фондаў, прычым грошы на гэта вылучаюцца не вельмі вялікія. Каб забяспечыць паказчыкі, бібліятэкары купляюць танныя кнігі — значыць, расійскія. Такім чынам за грошы беларускага бюджэту падтрымліваюцца расійскія выдавецтвы. Да таго ж, ідзе і прапаганда "рускага свету" сярод дзяцей.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.