Лявон Вольскі: “Крамбамбуля Сьвяточная” – песні для пазітыўных застолляў

“Еўрапейскае радыё” на прэзентацыі кружэлкі “Крамбамбуля.Сьвяточная”
“УРА, тав΄арышы( ці правільна таварышы΄?) – першая пяцігодка скончылася!” – з такіх словаў пачалася урачыстая прэзентацыя новага альбому “Крамбамбулі” пад назвай “Сьвяточная”.
Увогуле, усё мерапрыемства было вытрымана ў духу савецкага часу з
праекцыяй на сучаснасць. Да таго ж, з тонкім намёкам, што не так ужо і
далёка адыйшло нашае грамадства ад савецкага ладу жыцця. Перад уваходам
у рэстаран “Савецкі” – асабіста я, напрыклад, нават і не ведаў, што
такі ёсць у Мінску — гасцей сустракала дзяўчына ў нацыянальнай вопратцы
з хлебам–соллю.

Побач на імправізаваным стале была выкладзена прадукцыя
Узорнай Эксперыментальнай гаспадаркі (узэкга) Крамбамбуля – так,
дарэчы, называюць сябе самі музыкі — якая вельмі нагадвала звычайны
спажывецкі кошык савецкіх часоў: гарошак у шкляным слоіку, кілька ў
тамаце, “Беламор” і гэтак далей.

Як паведамляе друкаваны орган
Узэкга “Ураджай”, сама гаспадарка была заснавана пасля праслухоўвання
“алкагольных па змесце (але антыалкагольных па сутнасці) песень
хутарскога хлопчыка Лявончыка з вуліцы Паўла Волі”.

Вось тады і
вырашылі крамбамбульцы, што далей столькі піць і тужыць нельга. “Што
трэба працаваць і памнажаць пазітыў, як бы цяжка ні было. Бо цяжка
будзе заўжды, пакуль некалі не стане лёгка ад разумення таго, колькі
добрага было зроблена, калі было цяжка”. У выніку і нарадзілася музыка
пад назваю “Крамбамбуля. Сьвяточная.”

Нагадаем, што за першыя 2,5
гады існавання “Крамбамбуля” выдала тры альбомы: “Паўлітры добрага
настрою”, “Крамбамбуля 1,5. Каралі раёну” – быў запісаны разам з
музыкамі Сяргеем Міхалком, Аляксандрам Кулінковічам і Гюнеш Абасавай.
Абяцанне выдаць “Крамбамбулю Сьвяточную” прагучала падчас рэлізу “Радыё
Кпамбамбуля 0,33 FM” два гады таму. Музыкі зазначаюць, што новы альбом
– адзіная плытка, над запісам якой каманда крамбамбульцаў магла
працаваць колькі заўгодна па часе.

“Еўрапейскае радыё”
пацікавілася ў заснавальніка “Крамбамбулі” Лявона Вольскага, у якой
жыццёвай сітуацыі павінны гучаць такія песні:

“Я ведаю людзей,
якія за сталом падчас нейкіх святкаванняў слухаюць “Крамбамбулю”. Нам,
напрыклад, неаднаразова даводзілася граць нашыя песні на вяселлях. У
прынцыпе, гэтыя песні нармальна пасуюць для такіх пазітыўных застолляў.
Але ж, канешне, не для такіх, дзе б’юцца ды лаюцца; не для брутальных”.

На
думку спадара Вольскага, праект “Крамбамбуля” задумваўся з самага
пачатку як адарваны ад рэчаіснасці, але з цягам часу пераўтварыўся ў
нешта большае:

“Напачатку адрозненне было ў тым, што мы
спрабавалі рабіць праект цалкам для адпачынку. Без ніякіх падтэкстаў,
апярэджваючы перамогу дабра і справядлівасці ў нашай краіне. Так, мы
рабілі праект, адарваны ад рэчаіснасці, ад соцыуму і палітыкі ўвогуле.
Але, як паказала практыка, раней ці пазней гэта пачынае прасякацца.
Так, на апошнім дыску ўсё ж такі можна пачуць некаторыя алюзіі і
перакрыжаванні з рэальным жыццём”.

Сапраўды, песні з новай
“Крамбамбулі” проста прасякнутыя чыстым пазітывам. Да таго ж
прымеркаваны кожны трэк да нейкага свята. Як адзначае газета Узэкга
“Ураджай”, калі разглядаць святы на бытавым узроўні, то гэта проста
выходныя. Але ж калі спяваеш пра іх, заглядаеш у іх гісторыю і сучасныя
праявы, дык часам робіцца вельмі сумна.

Галоўнае, што пазітыву значна
больш, і ён перамагае. Таму на працягу ўсяго года кожны чалавек здолее
знайсці музыку пад адпаведны настрой. На погляд Еўрарадыё, менавіта
зараз можна заклікаць беларусаў: “Слухай сваё!”

Фота — часопіс РИО

Разам з Еўрарадыё вы можаце адчуць атмасферу “Крамбамбулі.Сьвяточнай”. Ніжэй прыведзены ўрыўкі з некалькіх песень новага альбому: