Ля амбасады Беларусі ў Варшаве чарга, каб трапіць у спісы выбаршчыкаў
![Чарга ў амбасаду Беларусі ў Польшчы / facebook.com](/sites/default/files/styles/gallery_main/public/2023-08/2020-08-03_14.28.06.jpg.webp?itok=1hUGz35i)
Чарга ў амбасаду Беларусі ў Польшчы / facebook.com
Ля амбасады Беларусі ў Варшаве выстройваюцца доўгія чэргі грамадзян, якія хочуць трапіць у спісы выбаршчыкаў і прагаласаваць на прэзідэнцкіх выбарах. "Амбасада вылучыла ўсяго дзве гадзіны ў дзень для рэгістрацыі. Людзі прыязджаюць, стаяць у чарзе і не паспяваюць!" — абураюцца грамадзяне Беларусі, якія жывуць у Варшаве.
Едуць мікрааўтобусамі
У амбасадзе Беларусі ў Варшаве Еўрарадыё пацвярджаюць, што да іх будынка стаіць чарга. Але працэс рэгістрацыі не паскараюць. Ды і сёння — апошні дзень, калі яе можна прайсці: 4 жніўня ўжо пачынаецца датэрміновае галасаванне.
Адна на ўсіх
Паводле звестак на чэрвень 2020 года, у Польшчы легальна працуюць амаль 42 тысячы беларусаў. Усяго, па розных ацэнках, там можа знаходзіцца ад 100 да 400 тысяч грамадзян Беларусі. У іх ёсць яшчэ адно пытанне да дыпламатаў: на выбарчым участку ў амбасадзе абсталявалі ўсяго адну кабінку для галасавання.
Беларусы перажываюць, што не паспеюць прагаласаваць, калі ўсе прыйдуць на ўчастак 9 жніўня.
— У павелічэнні колькасці адмаўляюць. Людзі, якія рэгіструюцца ў спісы, наўпрост просяць работнікаў консульства звярнуць увагу, якія чэргі стаяць пад іх вокнамі. Інфармуюць, што прыйдуць галасаваць 9 жніўня. На што работнікі адказваюць: "Ну, калі што, ёсць ксеракс. Бюлетэняў хопіць". А што іх адна кабінка не мае такой прапускной здольнасці, каб прыняць усіх ахвотных на працягу 12 гадзін? — каментуе сітуацыю Анастасія.
Прэс-сакратар амбасады Беларусі ў Польшчы тлумачыць, што рашэнне паставіць толькі адну кабінку звязана з эпідэміялагічнай сітуацыяй.
— У нас у амбасадзе недастаткова месца для таго, каб зрабіць чатыры-пяць кабінак. Мы робім усё, улічваючы супрацьэпідэміялагічныя рэкамендацыі. Ужо анансуецца другая хваля каранавіруса. Таму, каб была сацыяльная дыстанцыя, мы абсталявалі адну кабінку.
![У посольства Беларуси в Варшаве очередь, чтобы попасть в списки избирателей](/sites/default/files/paragraphs/image/2020-08-03144815.jpg)
А бюлетэняў хопіць на ўсіх?
У ЦВК Беларусі лічаць, што для галасавання за мяжой удакладненне спісаў з боку выбаршчыкаў асаблівага сэнсу не мае.
— Усё роўна выбаршчык прыйдзе з пашпартам. Без яго за мяжой прагаласаваць нельга будзе, нават калі ты ў асноўным спісе. Чалавек прыходзіць на датэрміновае або асноўнае галасаванне на выбарчы ўчастак. Прад'яўляе пашпарт, і яго ўносяць у дадатковы спіс, — расказвае Еўрарадыё намеснік загадчыка аддзела прававой, аналітычнай і метадычнай работы ЦВК Беларусі Іван Толкач.
Але як у такім выпадку амбасада ў Варшаве зможа ацаніць колькасць выбаршчыкаў і заказаць у Беларусі патрэбную колькасць бюлетэняў? У мінулыя выбары тут прагаласавала некалькі сотняў чалавек, але сёлета электаральная актыўнасць прыкметна вышэйшая.
— Можам сказаць, што ўсім, хто прыйдзе на ўчастак, бюлетэняў хопіць, — супакойваюць нас у амбасадзе Беларусі ў Варшаве. Але як адбудзецца гэта магія — не тлумачаць.
У амбасадзе не зацікаўленыя
Беларусы падаюць скаргі на парушэнне выбарчага заканадаўства.
![У посольства Беларуси в Варшаве очередь, чтобы попасть в списки избирателей](/sites/default/files/paragraphs/image/2020-08-03142746.jpg)
"Супрацоўнікі амбасады і сябры выбарчай камісіі не прынялі мер, каб забяспечыць высокую "праходнасць" і максімальную хуткасць апрацоўкі звестак патэнцыйных выбаршчыкаў за кошт прыцягнення большай колькасці сяброў камісіі да гэтай працэдуры.
Гэта наўпрост і ўскосна паказвае на тое, што работнікі амбасады не зацікаўленыя ў належным забеспячэнні і правядзенні дэмакратычных выбараў, што цягне за сабой як адміністрацыйную, так і крымінальную адказнасць", — гаворыцца ў адным з такіх зваротаў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.