Лукашэнка — пра Канстытуцыю і рэферэндум: "Мы яе зробім за два гады"
![Лукашэнка — пра Канстытуцыю і рэферэндум: "Мы яе зробім за два гады"](/sites/default/files/styles/gallery_main/public/2023-08/kanstytucyja-2606.jpg.webp?itok=SPMb_Dx-)
Новую Канстытуцыю Аляксандр Лукашэнка разлічвае атрымаць праз два гады. Пра гэта ён заявіў падчас паездкі на "Беларуськалій" у Салігорск.
Кіраўнік дзяржавы распавёў, што яму прапанавалі некалькі варынятаў Канстытуцыі, але змены ў праекце недадстакова рашучыя.
"Мы яе зробім за два гады. Некалькі варыянтаў мне ўжо прапанавана — яны не пасуюць. Людзі проста баяцца ўносіць больш рашучыя змены ў Канстытуцыю. Я думаю, нам гэта трэба зрабіць. Да прыняцця Канстытуцыі мы наогул шмат зробім у плане перадачы паўнамоцтваў уніз — да старшыняў райвыканкамаў, губернатара", — перадае БЕЛТА словы Лукашэнкі.
Па яго словах, у новай Канстытуцыі будуць пераразмеркаваныя паўнамоцтвы прэзідэнта, парламента і ўрада.
Згадаў кіраўнік дзяржавы і сваіх канкурэнтаў на сёлетніх выбарах. "Яна будзе прымацца на рэферэндуме, мы павінны дакладна вызначыць, якім шляхам будзем ісці. Ці мы пойдзем шляхам, як прапануюць сёння мае "альтэрнатыўшчыкі", праз прыватызацыю, рэформы і гэтак далей — гэта не са мной, я не пайду на злом сацыяльнага ўкладу нашай краіны", — заявіў ён.
Асобна Лукашэнка загаварыў пра ініцыятыву Віктара Бабарыкі вярнуцца да Канстытуцыі 1994 года. Кіраўнік дзяржавы лічыць, што гэта будзе крок назад, бо 1990-я былі не лепшымі гадамі для Беларусі.
"Я не хачу вяртання да гэтых часоў, не хачу, каб вы туды вярталіся, як бы тут некаторыя "альтэрнатыўныя" ні прапаноўвалі: "Нам трэба вярнуцца ў 1994 год і вярнуць тую Канстытуцыю". Можа, камусьці хочацца вярнуць — хай вернуць, толькі не трэба казаць пра рэформу і рух наперад, калі мы народ вядзем назад", — падкрэсліў Лукашэнка.
Дарэчы, сам беларускі кіраўнік пастаянна нахвальвае савецкі досвед і апелюе да савецкіх грамадскіх мадэляў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.