Лукашэнка перанёс штогадовае пасланне да народа і парламента
![Авальная зала Дома ўрада / belarus.by](/sites/default/files/styles/gallery_main/public/2023-08/000572_962752.jpg.webp?itok=onzYb8qU)
Авальная зала Дома ўрада / belarus.by
Штогадовае пасланне Аляксандра Лукашэнкі да народа і парламента перанесена на больш позні тэрмін. Традыцыйна Лукашэнка выступае з праграмнай прамовай у Палаце прадстаўнікоў у сярэдзіне красавіка. Але сёлета афіцыйнай інфармацыі пра пасланне пакуль няма.
Да канца красавіка засталося менш за 10 дзён. Калі меркаваць па графіку работы Палаты прадстаўнікоў, у гэтым месяцы дэпутаты ўжо не будуць збірацца ў Авальнай зале: на найбліжэйшыя дні запланавана работа ў камісіях, потым — чатыры выхадныя і работа ў выбарчых акругах.
![Лукашенко перенёс ежегодное послание к народу и парламенту](/sites/default/files/paragraphs/image/snimokekrana2020-04-21v132535.png)
Дэпутат Палаты прадстаўнікоў Андрэй Савіных расказаў Еўрарадыё, што дата паслання яшчэ не вызначана: "Яно, вядома, адбудзецца. Але будзе пазней, чым звычайна".
Іншыя дэпутаты, з якімі звязалася Еўрарадыё, таксама не валодаюць інфармацыяй пра дату паслання Аляксандра Лукашэнкі.
Яшчэ 26 сакавіка звязаны з адміністрацыяй прэзідэнта тэлеграм-канал "Пул Першага" пісаў, што работа над пасланнем "кіпіць" і "часу застаецца няшмат — тыдні тры". Інакш кажучы, пасланне, як звычайна, павінна было адбыцца ў канцы другой — пачатку трэцяй дэкады красавіка.
"Кажуць, структура ў першым набліжэнні ўжо ясная і некалькі тыдняў была на разглядзе першага [Аляксандра Лукашэнкі. — Еўрарадыё]. Часу застаецца няшмат, па нашых падліках — тыдні тры. Зрэшты, у цяперашні час прагнозы — рэч няўдзячная. Так што чакаем! Упэўненыя, і вы таксама ў чаканні. Сёлета нават мацней, чым звычайна".
Аднак за тры тыдні абстаноўка ў краіне сур'ёзна змянілася. Упалі цэны на нафту, а разам з імі і курс рубля да долара і еўра. Нарэшце было дасягнута пагадненне пра пастаўкі расійскай нафты ў 2020 годзе. Нашмат больш сур'ёзна выглядае цяпер сітуацыя з распаўсюджваннем каранавіруса ў Беларусі: з 26 сакавіка колькасць пацыентаў з пацверджаным COVID-19 павялічылася з 86 да 6264. Таму структуры паслання, якая "ў першым набліжэнні" была "ўжо ясная", відаць, спатрэбілася карэкціроўка.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.