Літоўская кампанія пачала пастаўку нафтапрадуктаў ва Украіну ў абыход Беларусі
У далейшым "LTG Cargo" плануе транспартаваць прадукцыю і з Клайпедскага порта / pixabay
Дзяржаўная грузавая кампанія групы Lietuvos geležinkelių (LTG) LTG Cargo пачала перавозкі нафтапрадуктаў ва Украіну ў абыход Беларусі, піша літоўскае выданне lrt.lt са спасылкай на кампанію.
Гаворка пра нафтапрадукты, вырабленыя на літоўскім заводзе Orlen Lietuvos. Кампанія плануе перавозіць гэтыя грузы два-тры разы на тыдзень. Мяркуецца, што да канца лета кампанія будзе перавозіць да 30 тысячаў тонаў грузу ў месяц.
"Перавозка нафтапрадуктаў — яшчэ адзін важны крок, каб дапамагчы Украіне вырашыць праблемы дэфіцыту нафты і зрабіць свой унёсак у задавальненне патрэбаў рынку краіны", — гаворыцца ў паведамленні кампаніі.
"LEG Cargo" перавозіць нафтапрадукты паміж тэрміналам Моцкава ў Літве і Тракішкі ў Польшчы. Затым праз Польшчу груз ідзе ва Украіну — гэты ўчастак шляху забяспечваюць польскія перавозчыкі і "Украінскія чыгункі".
У далейшым "LTG Cargo" плануе транспартаваць прадукцыю і з Клайпедскага порта.
