Gods Tower больш не будзе выдаваць альбомы

Гомельскія металісты Gods Tower працуюць над сінглам, які будзе складацца з некалькіх абсалютна новых песень ды дадатковых сюрпрызаў.

“Цяпер такая сітуацыя, што альбомы ўвогуле няма сэнсу выдаваць, — разважае лідар GT Лэслі Найф. — Дыскі цяпер дрэнна рэалізуюцца. Гурт укладвае грошы, а на выхадзе атрымлівае пшык. Таму хутчэй за ўсё мы засяродзімся на вытворчасці сінглаў. Але мне складана сказаць, будуць гэта інтэрнэт-рэлізы ці фізічныя”.

Бліжэйшы EP музыкі плануюць прэзентаваць ужо ў наступным месяцы. Што прада, Gods Tower не могуць рэгулярна рэпетаваць [гітарыст Віталь Абрамовіч жыве ў Мінску. — заўв. Еўрарадыё], таму справа можа зацягнуцца.

Цяпер гурт працуе над цалкам новай песняй, якая, па словах Лэслі Найфа, атрымаецца цягучай, павольнай, своеасаблівай і "верне Gods Tower да самых вытокаў". Апроч некалькіх новых трэкаў, сінгл змесціць і пэўныя сюрпрызы. Але падрабязнасці музыкі вырашылі прытрымаць у сакрэце.