Францыя навучыць беларусаў будаваць бяспечныя магільнікі ядзерных адкідаў
![Францыя навучыць беларусаў будаваць бяспечныя магільнікі ядзерных адкідаў](/sites/default/files/styles/gallery_main/public/2023-08/000346_16f106361936c93c2ed594af9804d8a7.jpg.webp?itok=GdIjpovM)
Францыя дапаможа Беларусі пабудаваць бяспечныя сховішчы для ядзерных адкідаў. Праўда, дапамога гэта будзе ў выглядзе абмену вопытам, кансультацый спецыялістаў у галіне ядзернай бяспекі і, магчыма, прадстаўлення тэхналогій. Пра гэта дамовіліся старшыня Савета Рэспублікі Беларусі Міхаіл Мясніковіч і намеснік старшыні камісіі Сената Францыі па фінансам Шарль Генэ.
“Абмяркоўвалася супрацоўніцтва ў ядзернай энергетыцы. Найперш ішла гаворка пра ядзерныя адкіды — іх утылізацыю і захоўванне. Шарль Генэ, кіраўнік французскай дэлегацыі, што да нас прыязджала, расказаў пра вопыт Францыі ў гэтай сферы і сказаў, што яны гатовыя гэтым вопытам падзяліцца. Размова ішла пра абмен спецыялістамі, арганізацыю стажыровак, абмен нейкімі тэхналогіямі. Усё гэта будзе дэтальна ў бліжэйшы час прапрацоўвацца”, — распавяла Еўрарадыё кіраўнік прэс-службы Савета Рэспублікі Вольга Казловіч.
Па яе словах, па выніку гэтых перамоў ніякіх дакументаў не падпісвалася, дамоўленасці былі на словах. Але, кажа Вольга Казловіч, чакаецца, што ўжо ў найбліжэйшы час перамовы на тэму ядзернай бяспекі будуць працягнутыя паміж адпаведнымі профільнымі арганізацыямі Беларусі і Францыі.
Дэлегацыя Сената Францыі на чале з кіраўніком сенатарскай групы сяброўства “Францыя – Беларусь” Шарлем Генэ наведала нашу краіну 16 красавіка.