Экс-палітвязня па "карагоднай справе" асудзілі зноў — з яшчэ пяцю брастаўчанамі
![Суд / Суд / Еўрарадыё](/sites/default/files/styles/gallery_main/public/2023-08/sud-0708.jpg.webp?itok=K5I6Aka-)
Суд
5 красавіка суддзя Андрэй Грушко ў Ленінскім судзе Брэста агучыў прысуды шасці гараджанам за ўдзел у акцыі пратэсту, якая адбылася 10 жніўня 2020 года, паведамляе "Брэсцкая Вясна".
Усіх іх вінавацілі паводле "народнага артыкула" — ч. 1 арт. 342 КК (арганізацыя або актыўны ўдзел у дзеяннях, якія груба парушаюць грамадскі парадак). Маўляў, брастаўчане "выкрыквалі лозунгі, дэманстравалі палотны бел-чырвона-белага колеру, груба парушаючы грамадскі парадак і спакой грамадзян, наўмысна перашкаджалі руху транспартных сродкаў і нармальнаму функцыянаванню прадпрыемстваў і арганізацый".
Падсудным прысудзілі наступныя тэрміны:
Віталь Чаркасаў і Аляксандр Жук (які ўжо цалкам адбыў тэрмін па "карагоднай справе") — па 2 гады 6 месяцаў калоніі агульнага рэжыму;
Арцём Завада, Уладзіслаў Барысаў — па 2 гады калоніі агульнага рэжыму;
Арцём Кадыраў — 1 год калоніі агульнага рэжыму;
Марыя Лёсік — 2 гады 6 месяцаў абмежавання волі без накіравання ў папраўчую ўстанову (т. зв. "хатняя хімія").
Дарэчы, Арцёму Кадыраву ў жніўні 2020 года яшчэ быў непаўналетнім.
Праваабаронцы заяўляюць, што гэта ўжо другая група людзей, асуджаных за пратэсты 10 жніўня 2020-га ў Брэсце. Першую групу судзілі з 5 па 14 сакавіка, але іх дакладныя прысуды невядомыя. Як мінімум частку людзей (з шасці абвінавачаных), паводле праваабаронцаў, таксама адправілі ў калонію.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.