Дзе патусіць на выхадных 4-6 красавіка, раіць Раман Сухоцкі

Лідар мінскага гранж-трыа Avias і удзельнік кранальнага дуэта Humusskiss Раман Сухоцкі бачыць два варыянты баўлення часу на выхадных:

"Часцей гэта сціплы адпачынак з сябрамі, чым наведванне мерапрыемстваў. Але, натуральна, розныя крутыя канцэрты я намагаюся не прапускаць. Напрыклад, на папярэдніх выхадных хадзіў на Дэльфіна, таму што з дзяцінства яго люблю".

Бліжэйшыя выхадныя таксама не стануць для Рамана выключэннем у сэнсе наведвання цікавых канцэртаў. І першы з іх — канцэрт легендарнай піцерскай каманды Animal ДжаZ, які адбудзецца ў пятніцу 4 красавіка ў сталічным клубе Re:Public.

"Я іх вельмі люблю за тое, што на постсавецкай прасторы мала хто грае, як яны, — кажа музыка. — Я аднойчы быў на іх канцэрце ў Мінску, я быў уражаны тым, наколькі людзі прафесійна граюць. Я такое мала дзе бачыў, нават сярод сусветных чувакоў".

Другі канцэрт, на які раіць схадзіць Сухоцкі, пройдзе ў нядзелю 6 красавіка ў мясцовым Doodah King Bar. У 21.00 маюць запаліць вечар сябры Рамана з гурта 2morrow2late:

"Гурт, які нядаўна выпусціў клёвы альбом. Гэта жывы, напорысты рок. Нават калі б яны не былі маімі сябрамі, я б усё роўна раіў схадзіць на канцэрт гэтага гурта, бо для Мінска гэта адзіная каманда, якая грае ў падобным стылі".

Апроч канцэртаў, Раман Сухоцкі любіць хадзіць у кіно.

"Учора хадзіў на "Ноя", — распавядае музыка пра свае ўражанні ад фільма Дарэна Аранофскі. — Гэта старажытная легенда. Добрая пастаноўка, хоць і галівудская. Мне было цікава падумаць пра міласэрнасць, пра вайну дабра і зла. Не шкадую, што схадзіў. Я не рэкамендую гэта як фільм першай важнасці, які неабходна паглядзець. Але калі на выхадных рабіць няма чаго, то наўрад ці нехта пашкадуе, паглядзеўшы гэтае кіно".

А вось афіша мінскіх выставаў і тэатральных пастановак музыку не надта ўразіла. Ды можа яно і да лепшага, бо на выхадных сіноптыкі абяцаюць пацяпленне і прыход сапраўднай вясны. Без дажджоў і ветру. Таму заменай мастацтву лёгка можа стаць прагулка на свежым паветры.