"Дабраном" прапануе касмічны заробак камплектоўшчыкам. У чым падвох?

19/01/2024 - 17:14

Чаму камплектоўшчыку гатовыя плаціць так шмат?

Чаму камплектоўшчыку гатовыя плаціць так шмат? / @rubanau_collage

Паводле звестак Белстата, у 2023 годзе сярэдні заробак у Беларусі да выліку падаткаў склаў каля 1970 рублёў. Знайсці працу з такім заробкам вельмі складана, асабліва калі няма профільнай адукацыі.

Праглядаючы адзін з сайтаў для пошуку працы, журналісты Еўрарадыё натыкнуліся на сапраўды прывабную вакансію. ЗАТ "Дабраном" шукае камплектоўшчыка і прапануе (увага!) ад 2900 да 5400 рублёў. Хоць сума пазначаная да выліку падаткаў, гэта ўсё роўна велізарныя грошы. Хтосьці наогул назаве іх неймавернымі для нашай краіны.

У дадатак да добрага заробку кампанія прапануе зручны графік — 2/2/4, уключаючы начныя змены, камфортныя ўмовы працы, афіцыйнае працаўладкаванне і нават пражыванне ў камфартабельным доме.

Адукацыя і досвед працы не маюць значэння. Ад кандыдата патрабуецца толькі быць адказным, прыстойным і ўважлівым.

Здавалася б, праца мары, але ў чым падвох? Мы вырашылі высветліць, што стаіць за гэтай шчодрай прапановай у экспертаў.

Не што іншае, як замануха

Эканаміст Валянцін Сакалоўскі называе асноўнай праблемай сеткавых крамаў у 2024 годзе недахоп лінейнага персаналу. Гэта адносіцца і да касіраў, і да грузчыкаў і да камплектоўшчыкаў.

— У апошнія гады адбыўся вялікі адток працоўных рук за мяжу, прычым неабавязкова ў Еўропу. Многія беларусы едуць працаваць вахтамі ў Расію, бо гэта прасцей, а часам і выгадней. Акрамя гэтага, многія спецыялісты сыходзяць у сферу анлайн-гандлю.

Эксперт адзначае, што такая вакансія — не што іншае, як "замануха", бо, па-першае, ад абяцанай зарплаты яшчэ трэба адняць падаткі, а па-другое, далёка не кожны чалавек зможа заняць гэтую пасаду.

— Такое месца здольны асвоіць рэальна дасведчаны і кваліфікаваны кіраўнік. Чалавек з сярэдняй адукацыяй або, напрыклад, пасля тэрміновай службы наўрад ці зможа туды ўладкавацца і зарабляць такія грошы.

Так, гэтая зарплата падаецца вялікай для аднаго чалавека, але з пункту гледжання кампаніі яна цалкам апраўданая. Камплектоўшчык займаецца зборам пэўнай колькасці і пераліку тавараў для невялікіх крамаў, якія дасылаюць заяўку на лагістычны комплекс. Ён збірае іх у адзін заказ і адпраўляе ў краму.

Праца вельмі адказная: да стратаў можа прывесці любая памылка ў заяўцы. Калі камплектоўшчыка няма, то крама застаецца без тавараў, а гэта вельмі нявыгадна для кампаніі. Таму прасцей знайсці адказнага чалавека з досведам і плаціць яму добрыя грошы, каб працэс не спыняўся.

На думку Сакалоўскага, для "Дабранома" такі чалавек нашмат актуальнейшы, чым, напрыклад, для "Кароны", бо іх фокус — гэта дробныя пункты з невялікім тавараабаротам. І тут важна сачыць за дакладнай колькасцю тавару, якія адпраўляюцца ў краму: скласці ўсё па спісе і не "накасячыць".

— Гэта тое, пра што кажуць усе эксперты: з краіны з'ехалі не толькі дактары і айцішнікі, але і "сінія каўнерыкі". У гэтых умовах кампаніям раздробнага гандлю даводзіцца канкураваць за працоўныя рукі, у тым ліку павышаючы патэнцыйным работнікам аплату працы, — рэзюмаваў эканаміст.

Хутчэй, гэта адзінкавы працэс на мікраўзроўні

Эканамістка цэнтра BEROC Анастасія Лузгіна мяркуе, што заробкі "Дабранома" і праўда вышэйшыя, чым прапануюць канкурэнты, але нязначна. Яна таксама звяртае ўвагу на розныя ўмовы працы ў канкурэнтаў.

— Напрыклад, на тую ж вакансію ў сетцы "Еўраопт" прапануецца працоўны дзень з 7 да 16, "Дабраном" прапануе прыкладна тое самае, але з начнымі зменамі, якія аплачваюцца даражэй.

Прывабнейшы заробак у сетцы "Дабраном" Лузгіна звязвае і з магчымым дэфіцытам працоўных рук.

— Сетка досыць актыўна развіваецца, і з улікам недахопу кадраў па краіне цалкам зразумела, чаму заработная плата расце. Наўрад ці гэта нейкі сур'ёзны перакос рынку. Хутчэй, гэта адзінкавы працэс на мікраўзроўні. Сёння мноства кампаній раздробных сетак, у іх ліку "Дабраном" і "Еўраопт", прапануе шэраг вакансій з прыкладна аднолькавымі заробкамі.

Экспертка адзначае, што дэфіцыт кадраў назіраецца ў шэрагу галін эканомікі Беларусі.

— Мы бачылі, як цягам усяго 2023 года з прычыны мяккай эканамічнай палітыкі ў краіне павышаліся заробкі, і гэта наўпрост звязана з банальнай адсутнасцю кадраў. Калі ёсць дэфіцыт рэсурсаў — значыць, ідзе павышэнне іх кошту. Тое самае адбываецца з "Дабраномам" і іх заробкамі для камплектоўшчыкаў, — падсумавала Анастасія.