Бізнес Мураўёва быў звязаны з Шэйманам і не толькі. Новае расследаванне БРЦ

20/03/2024 - 14:44

Аляксандр Мураўёў / belsat.eu

Аляксандр Мураўёў — вядомы беларускі прадпрымальнік, які ў пачатку двухтысячных быў адным з самых паспяховых бізнесменаў у краіне. Яго неафіцыйна называлі "шкляным каралём", у сімпатыях яму прызнаваўся нават Лукашэнка.

Аднак неўзабаве ад яго бізнесу не засталося ні следу, і ў 2015 годзе Мураўёў быў асуджаны на 11 гадоў турмы.

У 2022 годзе ён выйшаў на волю і нядаўна даў сваё першае інтэрв'ю пасля вызвалення, расказаўшы пра сваё бачанне тых падзей.

Беларускі расследавальніцкі цэнтр сумесна з Міжнародным кансорцыумам журналістаў-расследавальнікаў ICIJ і "Кіберпартызанамі" расказвае, з кім быў звязаны бізнес Мураўёва.

Еўрарадыё коратка пераказвае частку гэтага расследавання.

Сувязі з Шэйманам

Адной з прычын, з якой "шкляная імперыя" Мураўёва пачала разбурацца, магчыма, быў разлад у адносінах з партнёрамі. Аднак у размове з БРЦ бізнесмен настойвае, што не залежаў ад іх.

"Я — кіраўнік, такі, якім павінен быць кіраўнік групы прадпрыемства ATEC, здольны як мінімум ацэньваць сітуацыю, будаваць планы і імкнуцца іх рэалізаваць", — сцвярджае бізнесмен.

Тым не менш расследавальнікам удалося знайсці людзей, якія маглі стаяць за Мураўёвым. Паводле звестак БРЦ, інвестыцыі ў прадпрыемствы Мураўёва ішлі ў Беларусь праз аўстрыйскую кампанію ATEC Holding. У яе ў розны час было некалькі акцыянераў: аўстрыйская ATEC Handelsgesellschaft mbH, брытанская J&W Sanderson, а таксама некалькі кіпрскіх кампаній.

Кампанію ATEC Handelsgesellschaft mbH ў 2001 годзе заснаваў грамадзянін Аўстрыі Зігфрыд Кемедынгер.

Практычна адразу пасля адкрыцця Кемедынгер перадае кампанію Аляксандру Мураўёву, які зрабіўся аднаасобным уладальнікам, але пазней дзеліцца долямі з партнёрамі.

Адным з першых яе акцыянераў з доляй 3% — у той жа дзень, — робіцца грамадзянін Беларусі Яўген Чанаў. Тады ж ён трапіў у лік дырэктараў кампаніі.

Яўген Чанаў у канцы 2019-га і частку 2020-га ўзначальваў "ГардСервіс" — прыватную ахоўную кампанію, якая звязаная з Віктарам Шэйманам. Апошні — адзін з найбліжэйшых паплечнікаў Аляксандра Лукашэнкі, датычны да забойстваў яго палітычных апанентаў у 90-х.

Сам Аляксандр Мураўёў сувязі з Віктарам Шэйманам адмаўляе.

"Я ўпершыню чую, што ён чалавек Шэймана. Тады сапраўды ён ніякіх кантактаў з Шэйманам не меў. Прынамсі я пра гэта нічога не ведаў", — заявіў бізнесмен.

Паводле яго слоў, Чанаў займаўся бяспекай і сачыў, каб супрацоўнікі завода не пілі і не кралі.

Чанаў значыўся сярод дырэктараў ATEC Handelsgesellschaft да 2003-га, а сярод саўладальнікаў — да траўня 2004-га.

Яшчэ працуючы ў Мураўёва, Чанаў узначаліў Фонд ветэранаў спецпадраздзяленняў "АСА".

Офісы фонду і прадстаўніцтва ATEC Handelsgesellschaft размяшчаліся на адным паверсе ў будынку на вуліцы Някрасава ў Мінску.

На працу да Віктара Шэймана Чанаў перайшоў праз шмат гадоў пасля супрацоўніцтва з Аляксандрам Мураўёвым. Акрамя гэтага, БРЦ вывучыў біяграфіі людзей, якія працавалі з Мураўёвым, і налічыў дзесяць чалавек, звязаных з Шэйманам.

Многія супрацоўнікі яго прадпрыемстваў пасля сталі вядомыя як "людзі Віктара Шэймана" і перайшлі на працу ў структуры, звязаныя з правай рукой Аляксандра Лукашэнкі.