Беларускага журналіста НТВ ва Украіне пакінулі пад хатнім арыштам
Такое рашэнне 7 траўня прыняў апеляцыйны суд Днепрапятроўска ў дачыненні да затрыманага Сцяпана Чырыча.
Пра гэта інфармагенцтву БелаПАН паведаміў яго адвакат Ілля Бондар. Таксама суд не задаволіў просьбы аб спыненні крымінальнага пераследу Чырыча.
Нагадаем, паводле інфармацыі ўкраінскіх СМІ, у красавіку ў Днепрапятроўскай вобласці былі затрыманыя два мужчыны з журналісцкімі пасведчаннямі. Сярод іх быў беларус Сцяпан Чырыч, які здымаў сюжэт для тэлеканала НТВ. Затрыманых падазраюць у шпіянажы.
Чырыч працуе прадзюсарам у расійскай Першай прадзюсарскай кампаніі, якая займаецца вытворчасцю праграмы "Цэнтральнае тэлебачанне з Вадзімам Такмянёвым" для НТВ. Па звестках СМІ, другі затрыманы — аператар з Луганска.