Беларусь разглядае магчымасць рэверсных паставак нафты з Польшчы
![Беларусь разглядае магчымасць рэверсных паставак нафты з Польшчы](/sites/default/files/styles/gallery_main/public/2023-08/nafta-1501.jpg.webp?itok=GHc_pgvQ)
Дастаўка нафты з Польшчы ў Беларусь у рэверсным рэжыме тэхнічна магчымая. Пра гэта агенцтву БЕЛТА заявіў першы намеснік гендырэктара — галоўны інжынер ААТ "Гомельтранснафта Дружба" Андрэй Вярыга.
Па яго словах, гэты метад фактычна ўжываўся, калі ў 2019 годзе пасля красавіцкага інцыдэнту выцяснялі забруджаную нафту з польскага Гданьска ў Расію. Як вядома, тады з Расіі пачаліся пастаўкі бруднай нафты, ад якой адмовіліся некалькі краін.
Але Вярыга дадаў, што Польшча не мае тэхнічнай магчымасці адначасова пампаваць нафту ў двухбаковым рэжыме — "да сябе і ад сябе".
"Рэверсная дастаўка магчымая толькі з прыпынкамі. Да прыкладу, тыдзень пампуем нафту на Мазыр, а тры тыдні — з Мазыра", — патлумачыў спецыяліст. Ён дадаў, што пры такой умове задачу можна тэхнічна рэалізаваць. Вярыга ўпэўнены, што ў крытычнай сітуацыі польскі бок пойдзе насустрач Беларусі. Па яго словах, цяпер ідуць перамовы з польскімі калегамі.
Таксама Вярыга дадаў, што перамовы пра пастаўкі нафты ідуць з іншымі партнёрамі.
Пастаўкі расійскай нафты ў Беларусь прыпыніліся з 1 студзеня: Мінск і Масква не змаглі дамовіцца пра кошты на нафту. 4 студзеня кампанія Міхаіла Гуцарыева пачала пастаўкі нафты ў нашу краіну, але гэтай сыравіны дастаткова толькі для палавіннай загрузкі беларускіх НПЗ.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.