Беларусь купляе за мяжой крапіву і бярозавыя пупышкі

Беларусь закупляе за мяжой для лекавых мэтаў крапіву, бярозавыя пупышкі, святаяннік ды іншыя расліны. Пра гэта ў інтэрв'ю тэлерадыёкампаніі "Гомель" расказаў супрацоўнік Інстытута эксперыментальнай батанікі НАН Беларусі Алег Маслоўскі.

Па яго словах, на экспарце дзікарослых раслін Беларусь магла б добра зарабляць: "Гэта мільярдныя валютныя паступленні за кошт пісьменнага і рацыянальнага выкарыстання лекавых раслін".

У нарыхтоўчых арганізацыях тлумачаць, што сушаную крапіву прымаюць максімум па 5 рублёў за кілаграм, прычым усушка ў яе вельмі вялікая. А каб сабраць бярозавыя пупышкі ў камерцыйных маштабах, трэба даведвацца ў лясгасах, дзе плануецца пусціць пад высечку бярозы. Такім чынам, нарыхтоўка лекавых раслін становіцца ці эканамічна нявыгаднай, ці празмерна складанай.

Дарэчы, у Беларусі выкарыстоўваецца каля 270 відаў лекавых раслін. Больш за тры чвэрці лекавай сыравіны нарыхтоўваюць з дзікарослых раслін.