Азаранка выйшла ў паўфінал турніру ў Цінцынаці
У матчы чацвёртага кола беларуская тэнісістка абыграла Каралін Вазняцкі з Даніі — 6:3, 7:6 (7:5).
За выхад у фінал Вікторыя Азаранка, 2-я ракетка свету, пазмагаецца з сербскай спартсменкай Аленай Янкавіч (15-е месца ў сусветным рэйтынгу). А ў другім паўфінале згуляюць 1-я ракетка свету амерыканка Серэна Уільямс і кітаянка На Лі (5). Такім чынам, суперніцай Азаранкі зноў можа стаць Уільямс.
Прызавы фонд турніру ў Цінцынаці (Агаё, ЗША) складае 2 мільёны 369 тысяч долараў.
