Андрэй Арамнаў прапусціць чэмпіянат Еўропы дзеля Кнігі рэкордаў Гінеса
Вядомы штангіст збіраецца 15 метраў працягнуць 150-тонны БелАЗ. Пра гэта ён паведаміў у размове з Еўрарадыё.
Алімпійскі чэмпіён і неаднаразовы рэкардсмен свету ў цяжкай атлетыцы
беларус Андрэй Арамнаў, магчыма, прапусціць чэмпіянат Еўропы, які
адбудзецца ў красавіку ў Мінску. Як патлумачыў Еўрарадыё сам спартовец,
цяпер ён трэніруецца для ўсталявання новага сусветнага рэкорду. Камітэт
Кнігі рэкордаў Гінеса звярнуўся да штангіста з незвычайнай просьбай –
пацягнуць адзін з найбольшых у свеце грузавікоў.
Андрэй Арамнаў: “Мне паступіла сур’ёзная прапанова – падужацца з вельмі
вядомымі спартоўцамі з Кнігі рэкордаў Гінеса. І я, напэўна, прапушчу
чэмпіянат Еўропы ў Мінску. Таму што лепш за здаровае саперніцтва нічога
няма. Мы сыдземся ў канкрэтнай мужчынскай сіле – мы пацягнем “БелАЗ”!
150-тонны БелАЗ Арамнаў паспрабуе працягнуць 15 метраў. Плануецца, што
шоў адбудзецца 24 красавіка на пляцоўцы аэрапорта “Мінск”.
:) З 1 красавіка!
Фота: naviny.by
