За месяц пратэстаў у Венесуэле загінула ўжо 37 чалавек
![За месяц пратэстаў у Венесуэле загінула ўжо 37 чалавек](/sites/default/files/styles/gallery_main/public/2023-08/venesuela_reuters.jpg.webp?itok=vreRW5uF)
За месяц пратэстаў у Венесуэле загінула ўжо 37 чалавек. Апошняя ахвяра была 6 траўня, калі на вуліцах зноў адбыліся сутычкі пратэстоўцаў з паліцыяй. З пачатку красавіка падчас акцыяў пацярпелі таксама 717 чалавек, з некалькіх сотняў арыштаваных апазіцыянераў у турмах застаюцца 152, паведамляе ВВС.
Нагодай для пратэстаў стала рашэнне прэзідэнта Нікаласа Мадура склікаць новы парламент, які заменіць цяперашнюю Нацыянальную асамблею і будзе мець паўнамоцтвы па змяненні канстытуцыі краіны.
Мадура заяўляе, што новая канстытуцыя патрэбная, каб перадухіліць замежную змову супраць яго кіравання.
У ЗША лічаць гэтую прапанову спробай утрымацца ля ўлады, а ўрад Бразіліі называе дзеянні Мадура пераваротам.
У цяперашняй Нацыянальнай асамблеі большасць месцаў належыць апазіцыі.