Ва Украіне распачалі крымінальную справу на Арастовіча
Аляксей Арастовіч / unian.net
Ва Украіне распачалі крымінальную справу на Аляксея Арастовіча, былога пазаштатнага дарадцу кіраўніка Офіса прэзідэнта. Ён нібыта на закрытых семінарах называў жанчын "істотамі, якіх хочацца душыць". Скаргу на Арастовіча напісала дэпутат Вярхоўнай Рады Украіны Інна Саўсун. Яна атрымала адказ з паліцыі, які і апублікавала. Справу перадалі ў Кіеўскую гарадскую пракуратуру.
Офіс прэзідэнта Украіны прыняў адстаўку Аляксея Арастовіча ў студзені 2023-га. Перад тым у жывым эфіры ён зрабіў неправераную заяву пра жылы дом у Дняпры, у які пацэліла расійская ракета. Арастовіч сказаў, быццам гэтую ракету збілі сілы ўкраінскай супрацьпаветранай абароны. Улады Украіны афіцыйна абверглі гэтую заяву і падкрэслілі, што ракету не збілі, яна сама трапіла ў жылы дом. Аляксей Арастовіч публічна папрасіў прабачэння за памылку, спаслаўшыся на стомленасць.
