Усіх пацярпелых пад Смалявічамі перавялі ў мінскія клінікі
Дактары стабілізавалі стан пацыентаў, пацярпелых у аварыі пад Смалявічамі / t.me/minzdravbelarus
Усіх пацярпелых у аўтааварыі пад Смалявічамі пасля стабілізацыі стану перавялі ў мінскія лякарні, паведамляе прэс-служба Мінздароўя.
Пяць пацыентаў перавезлі ў абласную больніцу, трох — у цэнтр спалучанай траўмы БХМД, дзяўчынку — у РНПЦ дзіцячай хірургіі.
Першапачаткова людзі, якія пацярпелі ў аварыі пад Смалявічамі, былі дастаўленыя ў Смалявіцкую раённую лякарню. Шасцёра з іх былі ў цяжкім стане, трое атрымалі траўмы сярэдняй ступені цяжкасці.
Як распавядала Еўрарадыё, 20 лютага на трасе каля Смалявічаў улабавую сутыкнуліся маршрутка і гружаны МАЗ. У аварыі загінулі кіроўца маршруткі і дзесяць пасажыраў, у тым ліку адно дзіця.
