У інтэрнэт-кавярні будуць пускаць толькі па пашпарце
Згодна з пастановай Саўміна паказваць дакументы давядзецца і на пошце і ў інэтрнэт-кавярнях. У Белтэлекаме кажуць, што нават для іх гэта стала нечаканым.
Інтэрнэт-кавярням давядзецца збіраць пашпартныя дадзеныя сваіх кліентаў і адсочваць, якія сайты яны наведваюць. Гэтага патрабуе пастанова Саўміна ад 29 красавіка.
"У пунктах калектыўнага карыстання пры аказанні паслуг перадачы даных і тэлематычных паслуг ажыццяўляецца ідэнтыфікацыя абаненцкіх прылад шляхам вядзення электронных журналаў, куды ўключаюцца ідэнтыфікацыйныя звесткі пра абаненцкія прылады (МАС-адрас, унутраныя і знешнія IP-адрасы), даты, час правядзення злучэнняў і даменныя імёны ці IP-адрасы інтэрнэт-рэсурсаў, да якіх звяртаўся карыстальнік".
Гэтыя звесткі павінны захоўваць адзін год і выдаваць з патрабавання спецслужбаў і іншых органаў кантролю.
Дарэчы, згодна з пастановай Савета міністраў, гэтыя палажэнні набудуць моц адразу пасля афіцыйнага апублікавання. Тым часам у саміх кавярнях пра новаўвядзенні пакуль нічога не чулі.
"Можа гэта з першага ліпеня? А можа гэта рэкамендацыі? Вы пакідаеце залог, а ніякія дакументы пакідаць не трэба. Мы працуем паводле загаду кіраўніцтва, і нам такой інфармацыі пакуль ніхто не казаў".
Самі ж карыстальнікі вельмі не задаволеныя такімі новаўвядзеннямі.
"Я супраць гэтага. Цяпер не буду карыстацца інтэрнэтам тут, толькі дома. Напэўна, гэта ўводзіцца, каб кантраляваць інтэрнэт больш".
"Мне гэта непрыемна. Я ведаю, што не збіраюся рабіць нешта супрацьзаконнае. Але калі мае дадзеныя перапісваюць, складаецца ўражанне, што мяне па змоўчванні ў нечым падазраюць".
Дарэчы, два гады таму спрабавалі ўвесці ўлік карыстальнікаў інтэрнэт-клубаў, але тады гэта не прайшло. Потым падобны пункт з'явіўся ў адмысловым ўказе прэзідэнта, але пасля грамадскага абмеркавання і крытыкі гэтая пазіцыя адтуль зусім знікла — і цяпер з'явілася ў пастанове Савета міністраў.
Прад’яўляць дакументы давядзецца не толькі ў “пунктах калектыўнага доступу да інтэрнэта”. Пашпарт спатрэбіцца і на пошце, каб, напрыклад, адправіць факс, бо ў пастанове згадваюцца і “тэлематычныя паслугі”.
Паводле словаў эксперта Міхаіла Дарашэвіча, тэрмін "тэлематычныя паслугі" даволі стары і ўключае ў сябе ўсе віды сувязі, акрамя тэлеграфа, тэлефона і інтэрнэта.
"Гэта паслугі, якія аказваюць з дапамогай сетак электрасувязі, да якіх адносяцца перадача электронных і галасавых паведамленняў, арганізацыя аўдыё- і відэаканферэнцый, факсімільнай сувязі, за выключэннем тэлефаніі, тэлеграфных паслуг і перадачы даных".