У Беларусі ўвядуць адказнасць за прапаганду нетрадыцыйных сямейных адносін
Законапраект праходзіць "працэдуру ўзгаднення" (ілюстрацыйнае фота) / pixabay.com
У Беларусі ўвядуць адказнасць за прапаганду нетрадыцыйных сямейных адносін. Ужо падрыхтаваны адпаведны законапраект. Ён прадугледжвае адміністрацыйную адказнасць для "парушальнікаў" — "за прапаганду ненармальных адносін, педафіліі, добраахвотнай адмовы ад нараджэння дзяцей", заявіў генпракурор Андрэй Швед.
Швед нагадаў, што законапраект падрыхтаваны "з ініцыятывы органаў пракуратуры", цяпер ён праходзіць "працэдуру ўзгаднення". Раней у Генпракуратуры казалі, што Аляксандр Лукашэнка яго падтрымаў. А кіраўнік Савета бяспекі РБ Аляксандр Вальфовіч сёлета заявіў, што разбурэнне традыцыйнай сям'і — пагроза нацбяспецы.
Але адміністрацыйнай адказнасці мала, лічыць генпракурор. Паводле яго слоў, "важна праводзіць шырокую ідэалагічную і тлумачальную працу, у тым ліку ў школах".
