Следчы камітэт апублікаваў відэа з аўтааварыі ў Пастаўскім раёне
Следчы камітэт абнародаваў відэа з ДТЗ, якое адбылося 6 лістапада ў Пастаўскім раёне Віцебшчыны.
Як паведамляла Еўрарадыё, у аўтааварыі загінулі тры чалавекі — 43-гадовая маці і двое яе дарослых дзяцей. За рулём аўтамабіля "Рэно Лагуна" быў яе 22-гадовы сын. Акрамя таго, пасажырам аўто была 17-гадовая дачка жанчыны.
Паведамляецца, што кіроўца "Рэно" не ўлічыў ўмовы надвор'я і дарожныя ўмовы, таму не абраў бяспечную хуткасць руху. Аўтамабіль занесла на дарозе і вынесла на сустрэчную паласу. Там ён урэзаўся ў фуру "Івека Еўратэх", якая рухалася насустрач яму.
Выявілася, што загінулы кіроўца "Рэно" меў пасведчанне кіроўцы шэрагу катэгорый (B, C, D, BE, CE, DE, AM), якое атрымаў у лютым 2016 года.
Следчыя пачалі крымінальную справу за парушэнне правілаў дарожнага руху або эксплуатацыі транспартных сродкаў, што пацягнула па неасцярожнасці смерць дзвюх і больш асоб. Спецыялісты правялі агляд месца здарэння. Прызначаныя судова-медыцынская і аўтатэхнічная экспертызы, дапытаныя сведкі ДТЗ.
