У Беларусі паводка падтапіла 80 участкаў на дарогах
Але транспартная сувязь не парушаная, супакойваюць выратавальнікі.
Пра гэта Еўрарадыё распавёў прэс-сакратар Міністэрства па надзвычайных сітуацыях Віталь Навіцкі.
Навіцкі: “Гэта дарогі мясцовага значэння — напрыклад Баравое-Тартак Лельчыцкага раёну. Заўжды ёсць аб’езды ці ўзровень вады невысокі: грузавая машына можа праехаць. Таксама падтопленыя адзін пешаходны і чатырнаццаць аўтамабільных мастоў”.
Па звестках выратавальнікаў, за 21 красавіка паводкай падтоплена больш за 120 жылых дамоў. Адселены 31 чалавек. Аднак, кажуць выратавальнікі, забеспячэнне людзей усім неабходным не парушанае.
Фота — vetka.by