Прадпрымальнікі: “Калі ласка, правядзіце дэвальвацыю!”

21 красавіка ў Мінскім сталічным саюзе прадпрымальнікаў адбылася прэс-канферэнцыя, прысвечаная выкананню Дырэктывы №4. Але найбольш эмацыйна бізнэсоўцы абмяркоўвалі іншую тэму – валютную сітуацыю на беларускім рынку.

Падчас прэс-канферэнцыі прадпрымальнікі падзяліліся сваімі праблемамі.

Аляксей Пілінка, дырэктар прадпрыемства “Realpak”:

“Шмат якія кампаніі закрыліся, людзей адпусцілі ў адпачынкі. Чым больш пройдзе часу той вакханаліі на рынку, якая ёсць зараз, тым меней шансаў у гэтых кампаніі пачаць зноў працу. Дзесяткі тысяч людзей апынуцца на вуліцы”.

Спыняецца праца транспартных ды турыстычных кампаній. Канчаткова падарваны імідж дзяржавы, як эканамічна стабільнай, кажа Пілінка:

“Нашы пастаўшчыкі нам кажуць – мы вам цалкам давяраем як партнерам, але мы не давяраем вашаму ўраду, таму ні пра якую аплату па факце або частковую перадаплату гаворкі ісці не можа… Толькі 100% аплата кантрактаў. І толькі пасля гэтага будзе запушчаны працэс вытворчасці”.

Аматары папаліць зусім хутка могуць застацца без цыгарэт. Бо іх вытворчасць унутры краіны амаль спынілася, імпарту таксама няма, – кажа сустаршыня Рэспубліканскай канфедэрацыі прадпрымальніцтва Віктар Маргелаў:

“Па інфармацыі, якую я маю ў красавіку “Табакінвест” знізіў свае абароты на 98%. То бок практычна вытворчасць цыгарэт у нашай краіне спынілася. Ужо практычна тыдзень крамам іх не адгружаюць… Памятаеце тытунёвыя бунты ў 1990-х? Пастаўкі імпартных цыгарэт практычна спынілі, вытворчасць беларускіх – таксама”.

І падобныя праблемы цяпер шмат у якіх вытворцаў.

Ніякай іншай схемы выйсця з гэтай сітуацыі, акрамя ўсталявання адзінага курса – няма, упэўнены Маргелаў:

“Што заслужыла краіна, тое няхай і атрымае. Мы таксама пабяднеем... Але ў нас з’явіцца перспектыва. Сёння яе няма”.

А самі бізнесоўцы кажуць, што калі гэтага не адбудзецца, то яны выйдуць на вуліцы ў лозунгамі.

Аляксей Пілінка: “Калі ў бліжэйшы час не адбудуцца кардынальныя перамены на валютным рынку. Я маю на ўвазе адзіны валютны курс, няхай і высокі… Я думаю ўлады дамогуцца таго, што прадпрымальнікі выйдуць на вуліцы з лозунгамі – “Калі ласка, правядзіце дэвальвацыю”! Тое, чаго мы ўвесь гэты час баяліся, цяпер мы будзем гэтага чакаць як манну нябесную”.

Як адзначыў віцэ-старшыня сталічнага саюза прадпрымальнікаў, галоўны рэдактар часопіса “Фінансавы дырэктар” Андрэй Карпунін:

“Бізнесоўцы і іншыя людзі ўсё ж такі страхаваліся ад нейкіх дзеянняў Нацбанка. Але ніхто не думаў, што будзе абсалютнае бездзеянне”.