"Крымінальнікі" ва ўчастковыя камісіі не прайшлі, але трапілі ў ЦВК

Менш за 1% участковых камісій закрыла сваімі людзьмі апазіцыя. А ўсё таму, што вылучаюць людзей з крымінальным мінулым, сцвярджае сакратар Цэнтравыбаркама Мікалай Лазавік.

Мікалай Лазавік: “На жаль, прадстаўнікі палітычных партый не заўсёды клапоцяцца аб якасным складзе таго, каго яны рэкамендуюць. Асабліва шмат асоб, якія не карыстаюцца аўтарытэтам сярод насельніцтва, а маюць рэпутацыю бандытаў і крымінальнікаў, паступае падчас фармавання ўчастковых камісій”.

Крымінальнікамі, паводле Лазавіка, лічацца і тыя, хто мае за плячыма адседку па крымінальным артыкуле, і тыя, хто прыцягваўся да адміністрацыйнай адказнасці. За ўдзел у несанкцыянаванай акцыі альбо за мацюкі ў грамадскім месцы, да прыкладу.

Праўда, ніякія законы альбо інструкцыі не забараняюць уключаць такіх “крымінальнікаў” у склад выбарчых камісій, прызнае сакратар ЦВК. Але тут слова за чыноўнікамі мясцовых выканкамаў, якія ладзяць для прэтэндэнтаў кастынг.

Мікалай Лазавік: “Падбор кандыдатур — гэта суб’ектыўнае права мясцовых выканаўчых і распарадчых органаў. Гэта як на конкурсе: калі ёсць выбар, то яны маюць права выбіраць Іванова, Пятрова ці Сідарава”.

Ды і практычна няма сярод прэтэндэнтаў “палітычных крымінальнікаў”, большасць — сапраўдныя!

Мікалай Лазавік: “Тут адміністрацыйная адказнасць вельмі... За распіванне алкагольных напояў, за знаходжанне ў п’яным выглядзе ў грамадскім месцы, за здзяйсненне ДТЗ і пакіданне месца ДТЗ. А гэта ўжо мае пах злачынства. І нават ёсць грамадзяне, якія прыцягваліся за “ўхіленне ад утрымання дзяцей, якія знаходзяцца на дзяржаўным забеспячэнні”.

Такіх вось крымінальнікаў, паводле яго слоў, спрабавала прапхнуць ў выбарчыя камісіі Гродна Аб’яднаная грамадзянская партыя.

Навошта яны гэта робяць, цікавіцца Еўрарадыё ў лідара АГП Анатоля Лябедзькі. Той Лазавіку не верыць, але інфармацыю пра крымінальнае мінулае будзе ўдакладняць.

Анатоль Лябедзька: “Ужо была сітуацыя падчас фармавання акруговых камісій: Лазавік казаў, што мы прапанавалі туды самагоншчыкаў. Аўтарытэтна заяўляю, што наконт акруговых камісій, прыклады якіх прыводзіў Лазавік, за выключэннем аднаго чалавека, у якога ёсць судзімасць, гэта хлусня была. Я думаю, што не будзе выключэннем і выказванні па ўчастковых камісіях. Але мы зараз скажам, каб нам даслалі даведку па кожным прозвішчы асобна”.

Апроч АГП, сцвярджае сакратар ЦВК, ва ўчастковыя камісіі крымінальнікаў любяць прасунуць “Справядлівы свет” і Партыя БНФ.  Мясцовыя ўлады, якія і фармавалі склад гэтых выбарчых камісій, паставілі на іх шляху такую шчыльную засланку, што прайсці яе не здолеў ніхто. Нават тыя, хто адміністрацыйных артыкулаў у біяграфіі не маюць, здзіўляецца старшыня Партыі БНФ Аляксей Янукевіч.

Аляксей Янукевіч: “Большасць тых, каго мы вылучылі ў склад камісій, не былі пакараныя нават па цяперашніх законах ні ў крымінальным, ні ў адміністрацыйным парадку. За выключэннем палітычных ці звязаных з грамадскай актыўнасцю спраў”.

Пры гэтым лідар Партыі БНФ не выключае, што сярод некалькіх соцень вылучэнцаў мог патрапіць адзін-два з крымінальным мінулым і некалькі — з адміністрацыйным.

І ўсё ж, як стала вядома Еўрарадыё, адзін крымінальнік у выбарчую камісію патрапіў. Прычым, не ва ўчастковую, а... у Цэнтравыбаркам. Гэта — кіраўнік “Справядлівага света” Сяргей Калякін, смяецца намеснік старшыні партыі Валерый Ухналёў.

Валерый Ухналёў: “Мы накіравалі Сяргей Калякіна ў Цэнтральную выбарчую камісію сябрам з правам дарадчага голасу. Дык ён таксама лаяўся матам, на ім вісіць адміністрацыйнае пакаранне. Значыцца, ён таксама такі вось нягоднік”.

Такая ж сітуацыя з крымінальным мінулым і ў астатніх вылучэнцаў у склад камісій. Палітычныя артыкулы асобныя з іх маюць, а вось крымінальных ці ўзгаданых Лазавіком “слізкіх” адміністрацыйных няма ні ў каго.