Крымінальная адказнасць трэнеру Яфімаву не пагражае
Пра гэта карэспандэнту Еўрарадыё паведаміў старшыня Нацыянальнага антыдопінгавага агенцтва Аляксандр Ванхадла.
Еўрарадыё пацікавілася, ці пачнуць крымінальную справу на трэнера, які нібыта падсыпаў забароненае рэчыва спартоўцы Надзеі Астапчук.
Аляксандр Ванхадла: “У нас у краіне за гэта дзеянне не прадугледжана крымінальная адказнасць. Пакуль. Пакаранне — толькі паводле Сусветнага антыдопінгавама кодэксу (дыскваліфікацыя. — Еўрарадыё). Хутчэй за ўсё, спадзяваліся, што гэтая маленькая доза дасць мінімальны штуршок і не будзе зафіксаваная допінг-пробай”.
Нагадаем, што 11 верасня Нацыянальнае антыдопінгвае агенцтва паведаміла пра вынікі расследавання па “справе Астапчук”. Вінаватым, па версіі НАДА, стаў трэнер Аляксандр Яфімаў, які “падсыпаў забароненае рэчыва спартсменцы ў ежу”.
Сам Яфімаў не стаў каментаваць Еўрарадыё гэтую версію, але яскрава адрэагаваў на навіну: “Я змяню прозвішча Яфімаў на Ідыёта. Не глядзіце інтэрнэт і не чытайце газет”.
