Колькасць паліва ў баку мытнікі вымяраюць відэаэндаскопам і сумленнем
Цяпер па мінімальнай страхоўцы можна будзе паспець з’ездзіць за мяжу толькі два разы.
Толькі двойчы можна паспець з’ездзіць на сваім аўто за мяжу, маючы страхоўку на 15 дзён, якая па-ранейшаму каштуе 30 еўра. Калі часцей — трэба дэклараваць і плаціць пошліну за ўсё паліва, што ёсць у баку. І ўсё дзякуючы пастанове Саўміна, паводле якой без выплаты пошліны выязджаць у краіны ЕС ды Украіну можна будзе не часцей за адзін раз не ў 5, а ў 8 дзён.
Вось толькі павялічыць тэрмін дзеяння "замежнай" страхоўкі на аўто або прадаваць яе на меншую колькасць дзён страхоўшчыкі не могуць. І гэта, прызнаецца Еўрарадыё начальнік упраўлення транспартнага страхавання "Белдзяржстраха" Сяргей Грыбок, не ад іх жадання залежыць.
Сяргей Грыбок: “Гэта міжнародная сістэма “зялёная карта” — дакументы прымаюцца Саветам бюро, штаб-кватэра знаходзіцца ў Лондане і імі вызначаны мінімальны тэрмін дзеяння страхоўкі 15 дзён. Тут мы нешта змяніць не ў стане”.
Тое ж тычыцца і платы за страхоўку — кошт яе ўстаноўлены адпаведным указам кіраўніка дзяржавы.
Такім чынам тым, каму неабходна выязджаць за мяжу часцей, застаецца адно — дэклараваць колькасць паліва ў баку і плаціць за яго пошліну. Дарэчы, дэклараваць у такім выпадку давядзецца і адсутнасць паліва ў баку.
Вось тут пачынаюцца праблемы. Рэч у тым, што замераць колькасць бензіну і прыняць за яго плату немагчыма адразу на мяжы. Для гэтага, распавядае Еўрарадыё кіраўнік прэс-службы Мытнага камітэта Ігар Пяшко, трэба ехаць у адмысловыя пункты мытнага афармлення.
Ігар Пяшко: “Вызначаны пералік пунктаў мытнага афармлення, куды можна звярнуцца і падаць дэкларацыю. Усе рэквізіты, усе плацяжы там разлічваюцца”.
А гэта — бліжэйшы да мяжы раённы цэнтр. Вось толькі нават у гэтых адмысловых пунктах мытнага афармлення да гэтага часу няма прыбораў для замеру колькасці паліва ў баку. Ігар Пяшко кажа, што... яны мытнікам і не патрэбныя!
Ігар Пяшко: “А для гэтага не трэба прыборы замеру — там вызначаны парадак. Казаць, якім чынам гэта робіцца, гэта пытанні мытнага органа — якім чынам вызначыць колькасць. І той асобы, якая дэкларуе гэтае паліва. Асоба ведае, колькі яна павінна задэклараваць, і, у прынцыпе, асоба нясе адказнасць за праўдзівасць тых дадзеных, якія падаюцца мытнаму органу”.
Выглядае на тое, што ўсё будуецца на даверы: аўтааматар кажа праўду, колькі ў яго паліва заліта, мытнік верыць на слова і накіроўвае аплаціць. Пры гэтым назваць кошт задэклараванага літра паліва прэс-сакратар Мытнага камітэта не здолеў.
Ці сапраўды толькі словам аўтааматара вылічваецца колькасць паліва ў баку машыны, Еўрарадыё цікавіцца ў начальніка аддзела арганізацыі мытнага кантролю Ашмянскай мытні Наталлі Канановіч. Але і яна даводзіць Еўрарадыё, што хлусіць мытніку нельга.
Наталля Канановіч: “Кажуць праўду тыя, хто выязджае. Вы ж разумееце, што такога нельга рабіць, гэта недапушчальна і ніхто нікога не падманвае, і ніхто нікому не хлусіць”.
А пасля чарговай спробы даведацца, ці маюць супрацоўнікі іх мытні прыбор для вызначэння колькасці паліва ў баку, і ўвогуле раіць... не ездзіць так часта на машынах.
Наталля Канановіч: “Каму трэба часцей — могуць перасоўвацца іншымі відамі транспарта. Вы ж разумееце, што пастанова была накіраваная на тое, каб пэўная катэгорыя асоб не вывозіла паліва”.
Арыгінальны сродак вылічваць колькасць паліва ў баку вынайшлі супрацоўнікі Пінскай мытні. Паводле словаў начальніка аддзела арганізацыі мытнага кантролю Віталя Носава, робяць яны гэта з дапамогай відэаэндаскопа. Гэта нешта накшталт... медыцынскага зонда.
Віталь Носаў: “Гэта відэаэндаскоп. Вось, як ідзе даследаванне страўніка ў чалавека. Адпаведна і мы з дапамогай гэтага прыбора можам упэўніцца на ўласныя вочы — у грамадзяніна чвэрць бака, як паказвае датчык, ці там поўны бак”.
Вось толькі і з дапамогай гэтай прылады вызначыць да літра колькасць паліва ў баку немагчыма. Толькі сказаць — чвэрць там, палова ці ён поўны. Таму фактар веры на слова і тут прысутнічае.
Супрацоўнік Пінскай мытні здолеў згадаць толькі адзін выпадак, калі чалавек заплаціў за паліва ў баку. Таму не адразу здолеў сказаць, колькі гэтая пошліна складае. У выніку высветліў, што за літр дызеля трэба плаціць 30 цэнтаў, а бензіну — 42 цэнты.
Фота: http://photo.bymedia.net/