Гамельчука Ігара Случака асудзілі на трое сутак
Але ён іх адседзеў пасля затрымання 26 жніўня. Таму суд палічыў пакаранне выкананым.
Нагадаем, што юнака затрымалі, калі ён рыхтаваў круглы стол па рэформе МУС. Яго абвінавацілі ў нецэнзурнай лаянцы. З пятніцы да панядзелка Случак правёў у ізалятары часовага ўтрымання.
На судзе супраць актывіста сведчыў гамяльчуц Сяргей Замай. Паводле звестак БелаПАН, ён паказаў, што Случак на вуліцы штурхануў яго і аблаяў матам. Сведка прызнаў, што стаяў на ўліку ў інспекцыі па справах непаўналетніх, неаднаразова прыцягваўся да адміністрацыйнай адказнасці.
Таксама супраць Случака сведчылі спецназаўцы Аляксандр Панчанка, Аляксандр Семчанка і Юры Бярозкін. Міліцыянты паказалі, што, калі яны неслі службу, да іх падышоў грамадзянін і паскардзіўся, што Случак абразіў яго матам.
Актывіст не прызнаў сябе вінаватым, рашэнне суда ён будзе абскарджваць. Працэс ён назваў фарсам.
