Дзе патусіць на выхадных? Раіць Каця Пытлева

130328_malina_afisha_0.mp3

Вясна не за гарамі, абяцаюць сіноптыкі. Але на сталічных афішах пакуль гэта не адлюстроўваецца: вартых канцэртаў у двухмільённым Мінску праходзіць да смешнага мала. Ну што зробіш: гуляць па горадзе пакуль халаднавата, а сядзець усе выхадныя дома — не наш варыянт. Таму ўсё ж давядзецца нешта выбраць.

Тэле- і радыёвядучая, шоў-вумэн, музыка і літаратар Каця Пытлева ведае пра ўсе культурныя падзеі горада нават крыху больш, чым трэба для аб’ектыўных парадаў. Таму адразу выпальвае цэлы спіс канцэртаў, на якія схадзіла б з задавальненнем, але фізічна не паспее.

Для Каці ўік-энд пачнецца канцэртам экс-удзельніка “Машины времени” Яўгена Маргуліса. Хацелася б дыджэйцы паспець і на Nazareth у Палацы Рэспублікі, а таксама зачапіць Pomidor/OFF у рок-бары “Крылья”. Працягваючы тэму класікаў року, журналістка прапануе ў суботу схадзіць на трыб’ют гурту AC/DC ў клуб “Центр”. Маўляў, на канцэрт аўстралійцаў патрапіць невядома калі атрымаецца, а ўкраінцы AS/DS вельмі ўдала перадаюць іх музыку. А ў нядзелю Каця раіць адпачыць пад абсалютна розныя, але эмацыйна падобныя гурты Hair Peace Salon і Clover Club у TNT Rock Club.

“З задавальненнем схадзіла б у галерэю Беларускага саюзу дызайнераў на “A posteriori: от объекта к плакату, или Фото без шопа”, — планаванне культурнай праграмы на выхадныя пераходзіць да выставаў. — Шмат паглядзела ды пачытала, каб разабрацца, што такое пастановачны плакат, і мяне гэта вельмі зацікавіла. Абавязкова наведала б выставу Віталя Чарнабрысава. Гэтага мастака можа і не вельмі ведаюць у нас, але ён вядомы за мяжой. Ён датычны да піцерскіх "Міцькоў", але жыве ў Мінску, і ў яго вельмі цікавая творчасць. Ну, і абавязкова паглядзела б на атмасферу кватэрніка 1980-х, якую стварылі ў Доме-музеі РСДРП. Цікава, чым менавіта вырашылі прадставіць той час ды тыя пачуцці”.

Кінапрэм’еры гэтага тыдню Кацю Пытлеву не чапляюць. Хутчэй наадварот, на фільмы кшталту “Гостья”, “Тревожный вызов” ды “G.I. Joe: Бросок кобры 2” яна хадзіць не раіць нікому. А калі будзе адпаведны настрой, то можна паглядзець адзін з фільмаў Вудзі Алена, акурат ужо тыдзень ладзіцца яго рэтраспектыва ў кінатэатры “Ракета”. Тым больш там будуць паказваць культавы фільм “Спящий”.

“З тэатраў я вельмі спадзяюся, што патраплю на “Х-Традиция” тэатра “ИнЖест”. Вельмі люблю гэтую трупу, тое, што яны робяць, перакананая, што гэта будзе пастаноўка, што ўражвае. Ну, і, натуральна, фестываль “Куфар_Пластилин”. Там шмат пастановак, спектакляў, ідзе ён некалькі дзён, таму на гэты “тыдзень пластычных мастацтваў” я б таксама зазірнула”.

Дарэчы, “Куфар_Пластилин”, на думку Каці Пытлевай, выдатнае мерапрыемства для аматараў танцаў. Тым больш што гэты тыдзень увогуле багаты імпрэзамі для танцораў.

“Па-першае, гэта Dance Evolution і Extreme Games Belarus — літаральна абавязковыя мерапрыемствы для аматараў сучаснага танца. Я заўсёды захаплялася тымі, хто ўмее танчыць, бо я сама не ўмею. Калі вы хоць крыху зацікаўленыя гэтай тэмай і нават калі толькі падумваеце заняцца танцамі, там будзе вельмі шмат чаго і гэтыя мерапрыемствы дакладна для вас”.

На завяршэнне Каця Пытлева здзіўляецца людзям, што ходзяць на Валерыя Лявонцьева, Лаліту, Ані Лорак і іншых падобных выканаўцаў. А ў дадатак не ўяўляе, што можна рабіць на “Тыдні моды”. Маўляў, “не маё гэта, ды і сумна неяк глядзець на людзей, што туды-сюды ходзяць і паказваюць вопратку”.