Вы тут

Рэктар Акадэміі мастацтваў адмовіўся аднаўляць адлічаных студэнтаў (дакумент)

Акадэмія мастацтваў / wikipedia.org

Студэнтаў, адлічаных з Беларускай дзяржаўнай акадэміі мастацтваў, аднаўляць у гэтай ВНУ не плануюць. Гэта вынікае з адказу, які рэктар БДАМ Міхаіл Баразна даў на калектыўны зварот, пад якім падпісаліся студэнты, выпускнікі і выкладчыкі. 

Ініцыятарам звароту стала тэатральны крытык і кандыдат мастацтвазнаўства Крысціна Смольская. Яна ж апублікавала ў Фэйсбуку і адказ Баразны, які атрымала 17 лістапада.

Патрабаванні падпісантаў рэктар назваў беспадстаўнымі. Ён спаслаўся на артыкулы 79 і 126 Кодэкса аб адукацыі, якія рэгулююць дамоўныя адносіны паміж навучэнцамі і ўстановай адукацыі.

А пасля гэтага заявіў, што студэнтаў з БДАМ адлічалі і раней: "За час існавання з БДАМ быў адлічаны не адзін дзясятак студэнтаў, магістрантаў па розных прычынах, у тым ліку і па вінаватых падставах". Што маецца на ўвазе пад "вінаватымі падставамі", у дакуменце не ўдакладняецца. 

Баразна нагадаў, што адлічаныя студэнты могуць аднавіцца ў адпаведнасці з Кодэксам аб адукацыі.

Завяршае свой адказ рэктар тым, што называе патрабаванне калектынага звароту "галаслоўным", не пацверджаным дакументальна і неаб'ектыўным. Па яго словах, няма ніякіх законных падстаў аднавіць адлічаных студэнтаў.

"У прыватнасці, з якой мэтай неабходна "аднавіць ужо адлічаных", калі адлічаныя з БДАМ завяршылі засваенне адукацыйнай праграмы?" — пытаецца Баразна. Гэты пасаж таксама ніяк не тлумачыцца. Раней паведамлялася, што з Акадэміі мастацтваў былі адлічаныя студэнты трэцяга і нават другога курса. Большасць з адлічаных да выпускнога курса не давучылася.

Адказ рэктара Міхаіла Баразны / facebook.com
Адказ рэктара Міхаіла Баразны / facebook.com

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.