Расія збіраецца выдаць Беларусі яшчэ аднаго ўдзельніка пратэстаў
Расія збіраецца выдаць Беларусі яшчэ аднаго ўдзельніка пратэстаў — Андрэя Казімірава. Насуперак забароне Еўрапейскага суда па правах чалавека, як і ў сітуацыі са спартсменам Аляксеем Кудзіным, паведамляе openmedia.io.
Выдаць Беларусі Андрэя Казімірава, фігуранта справы аб "масавых беспарадках", дазволіў расійскі суд. Рашэнне ўступіла ў сілу 29 ліпеня.
Казіміраў удзельнічаў у мірных пратэстах у Брэсце пасля прэзідэнцкіх выбараў 2020 года ў Беларусі і быў паранены гумовай куляй у нагу. Яго разам з сябрам затрымалі ў жніўні. Па словах адваката, хлопца збівалі, а праз два дні ўзялі пісьмовую заяву, што ён не мае ніякіх прэтэнзій да міліцыянераў і адпусцілі. У верасні мінулага года Андрэй Казіміраў з'ехаў з Беларусі. У студзені сёлета яго затрымалі ў Расіі.
Казіміраў — адзіны затрыманы ў Расіі беларус, якога расійскія праваабаронцы прызналі палітвязнем.
Раней Еўрапейскі суд па правах чалавека забараніў выдаваць Беларусі затрыманага ў РФ спартсмена Аляксея Кудзіна, удзельніка пратэстаў у жніўні 2020-га. Аднак яго ўсе роўна перадалі беларускім праваахоўнікам і ён знаходзіцца ў следчым ізалятары ў Беларусі.
