Праз 3 гады ў кожнага жыхара Еўрасаюза будзе хуткасны інтэрнэт

20 верасня Еўракамісія прадставіла свае прапановы па развіцці інтэрнэта. У той самы дзень у Мінску абмеркавалі еўрапейскі вопыт кіравання інтэрнэтам за круглым сталом.

У адпаведнасці са Стратэгіяй развіцця інфармацыйнага грамадства, зацверджанай Саветам Міністраў 9 жніўня, да 2015 плануецца забяспечыць шырокапалосным інтэрнэтам 38% жыхароў нашай краіны.

Тым часам стратэгія развіцця лічбавых тэхналогій Еўрапейскай камісіі прапануе да 2013 забяспечыць шырокапаласным інтэрнэтам усіх жыхароў Еўрасаюза. А да 2020 года – усіх забяспечыць звыш-хуткім інтэрнэт-доступам (болей за 30 Мбіт за секунду), і не менш за палову – з хуткасцю 100 Мбіт за секунду.

"Хуткі шыракапалосны інтэрнэт – гэта, можна сказаць, "лічбавы кісларод", ён неабходны для дабрабыту і росквіту Еўропы. Ніхто не сумняваецца: калі кожны апынецца ў ан-лайне, то Еўропа ад гэтага выйграе... Я не магу дапусціць, каб еўрапейскія кампаніі канкуравалі з азіяцкімі з іх інтэрнэтам у 100 разоў хутчэйшым, чым наш. Сённяшнія прапановы стануць гучным і ясным сігналам для еўрапейскіх кампаній і грамадзянаў", – заявіла Еўракамісар па лічбавых тэхналогіях Нээлі Кроэс (Neelie Kroes).

Яна прадставіла ў Бруселі тры прынцыповыя прапановы да пераходу да хуткага і звышхуткага шырокапалоснага інтэрнэту ў Еўрасаюзе.

Па-першае, развіццё так званага Доступу наступнага пакалення (Next Generation Access). Нацыянальныя тэлекамунікацыйныя кампаніі заклікаюць, з аднаго боку, прывабіць інвестыцыі ў шырокапалосную інфраструктуру, а з другога, забяспечыць здаровую канкурэнцыю.

Па-другое, еўракамісар заклікае Еўрапарламент і Савет Міністраў прыняць 5-гадовую праграму развіцця радыёчастот, даступных для бяздротавага шыракапалоснага інтэрнэту.

Па-трэцяе, рэкамендацыі, як найлепшым чынам прывабіць прыватныя і дзяржаўныя інвестыцыі ў шыракапалосныя сеткі. Еўрапейскаму інвестыцыйнаму банку прапануецца падрыхтаваць фінансавыя механізмы падтрымкі ініцыятывы.

Нээлі Кроэс: "Мы прадстаўляем, як прывабіць не менш за 200 мільярдаў еўра ў якасці прыватных і дзяржаўных інвестыцый у хуткія і звышхуткія шыракапалосныя сеткі, патрэбныя Еўропе".

Адзначым, што эканамічны крызіс можа адмоўна паўплываць на перспектывы плана Еўракамсіі.

Дарэчы, 20 верасня ў Мінску адбыўся круглы стол, прысвечаны інтэрнэту. Яго арганізавала Прадстаўніцтва Еўрасаюза і Інстытут філасофіі Акадэміі Навук Беларусі. Падчас круглага стала супрацоўнік  Інстытута філасофіі Акадэміі Навук Сцяпан Мякчыла выказаўся, што ані амерыканская, ані кітайская мадэль развіцця інфармацыйнага грамадства Беларусі не пасуюць.

Сцяпан Мякчыла: "Ёсць і трэцяя мадэль, якая кардынальна адрозніваецца ад першых дзвюх, пры якой дзяржава свядома і мэтанакіравана займаецца пабудовай інфармацыйнага грамадства, не давяраючы прыватнай ініцыятыве. Адначасова не дапускаючы сеткавай няроўнасці і абараняючы грамадзян ад негатыўных эфектаў сеткавай экспансіі. Мяркую, што для нашай краіны з яе сацыяльна арыентаванай мадэллю яна з'яўляецца найбольш актуальнай".

У выпадку рэалізацыі ў краіне гэтай мадэлі, падыходы Еўрасаюза і Беларусі будуць заўважна адрознівацца.

Фота: roaps.com