Пасля пажару ў Гомелі шпіталізавалі жанчыну з дачкой
Уначы 4 сакавіка, у 23.56, гомельскіх ратавальнікаў выклікалі на пажар: гарэла кватэра ў доме 4 па вуліцы Алмазнай, паведамляе прэс-служба МНС.
На месцы выкліку супрацоўнікі МНС пабачылі дым, які ішоў з акна на чацвёртым паверсе дзесяціпавярховага панэльнага дома. На лесвічнай клетцы знаходзіліся 22-гадовая гаспадыня кватэры з трохгадовай дачкой.
Ратавальнікі перадалі жанчыну з дзіцем брыгадзе хуткай меддапамогі. Іх шпіталізавалі з папярэднім дыягназам "атручэнне прадуктамі гарэння".
Агонь пашкодзіў маёмасць у пакоі, у кватэры закураныя сцены.
Спецыялісты высвятляюць прычыны пажару. Мяркуецца, што прычынай магло стаць парушэнне правілаў эксплуатацыі электрасетак і электраабсталявання.
