Падобна на тое, што ў Лукашэнкі змяніўся спічрайтар. Тлумачым, чаму
Сюжэт грэчаскага міфа: Кедаліён сядзіць на плячах у Арыёна. Ілюстрацыя: "Вікіпедыя".
10 красавіка, сустракаючыся з журналістамі, Аляксандр Лукашэнка сказаў дзіўную фразу: "Як казаў класік, мы павінны стаяць на плячах мінулых пакаленняў і ўзяць адтуль усё лепшае".
Чые гэта плечы і хто на іх стаіць?
У такім выглядзе словы пра плечы мінулых пакаленняў сустракаюцца толькі ў справаздачах пра тую прэс-канферэнцыю. Так што "класік" відавочна казаў нешта іншае. Ды і што гэта, уласна кажучы, за класік?
Блізкая да выказвання Лукашэнкі фраза прыпісваецца сэру Ісааку Ньютану. "Калі я бачыў далей за іншых, дык таму, што стаяў на плячах гігантаў", — нібыта напісаў фізік ў лісце да Роберта Гука, маючы на ўвазе вялікіх матэматыкаў мінулага.
Вобраз магутных волатаў з мінулых часоў сышоў у народ. Неўзабаве дасціпныя інтэлектуалы перарабілі цытату, дадаўшы ў яе... карлікаў! Маўляў, Ньютан, які зрабіў адкрыццё, сціпла апраўдваўся: "Я падобны да карліку, які стаяў на плячах гігантаў". У такім выглядзе фраза сустракаецца ў спрэчцы аўстрыйскага псіхіятра Вільгельма Штэкеля з Зігмундам Фрэйдам: "Карлік, які стаіць на плячах гіганта, можа бачыць далей, чым сам гігант", — сказаў аўстрыец.
Хто перабег дарогу ката?
У фразе Аляксандра Лукашэнкі пра карлікаў, вядома, ні слова. Якія такія карлікі? Беларусы — гіганты на плячах гігантаў з папярэдніх пакаленняў, і ніяк інакш!
Плечы ўжо сустракаліся ў прамовах кіраўніка Беларусі. Але звычайна гэта было ў кантэксце "падставіць сваё плячо". "Плечы мінулых пакаленняў" і класік, які сказаў пра іх, згаданыя ўпершыню. І гэта зусім не дзіўна: раней Лукашэнка ўвесь час цытаваў зусім іншага класіка!
Ажно 8 разоў, пачынаючы з 2003 года, ён згадвае ў сваіх пасланнях і інтэрв'ю знакамітую фразу кітайскага палітыка Дэн Сяапіна: "Якая розніца, якога колеру кошка, абы мышэй лавіла". У апошні раз яна прагучала два гады таму, у красавіку 2016 года, падчас штогадовага паслання да беларускага народа і Нацыянальнага сходу.
З тых часоў — ніякіх котак! Хаця... У мінулагоднім пасланні Лукашэнка ката не проста згадаў, а працытаваў: "Давайце жыць дружна, як казаў вядомы персанаж". Кот — ды не той!
Новы спічрайтар — новыя вобразы? І новыя класікі! Наступнае пасланне народу і парламенту намечанае на 24 красавіка. Вашы стаўкі, каго згадае Лукашэнка: гігантаў з мінулых пакаленняў ці котку нявызначанага колеру?
